ADUNA nay person of interest ug tungod sa iyang pagka-negusyante ang gitutokan na karon sa Talisay City Police Station sa pagpatay kang Dr. Neil Boligao.

Dakong kwarta usab ang nalambigit sa maong negusyo hinungdan nga ni-hire ang mastermind og mga gun-for-hire, tug-an ni Major Gerard Ace Pelare, ang hepe sa TCPS.

“Definitely gun-for-hire to sila. Amo nakita ani nga naay daku nga kwarta nga involved. The mastermind hired gun-for-hire para i-liquidate si Doc. Naa na tay mga pieces of evidence that could lead us to the suspect,” butyag ni Pelare sa Superbalita Cebu.

Nagdumili lang una sa pagtug-an si Pelare kon unsa niini nga negusyo ang ilang gisubay aron di usab ma-compromise ang gihimo nga pakisusi.

Si Boligao, kinsa usa ka beterinaryo, gibahigan-patay sa iyang paggawas sa ihawan sa Barangay Biasong, Dakbayan sa Talisay, ala 1:45 Lunes sa kaadlawon, Disyembre 30.

Luwan siya sa iyang puti nga sakyanan gikan nagdala sa mga baboy nga gipaihaw sa slaughterhouse aron usab ipangbaligya sa Carbon market, Siyudad sa Sugbo.

Gitug-an ni Pelare nga gisalikway na nila ang anggulo kabahin sa iyang pagka-veterinarian ug mas gituokan ang kabahin sa iyang mga negusyo.

“Ang dagan sa investigation is really narrowing down to the business angle. Daghan man gud business ventures ang victim, some of his business undertakings naa siyay mga nakalalis and pending cases sa DOLE (Department of Labor and Employment). Businessman siya, and naa sad siya consultancy. Amo nani karon gitagsa-tagsa og backtrack,” saysay ni Pelare.

Death threat

Dugang sa hepe nga niangkon ang suod nga mga higala ug kauban sa trabaho sa biktima nga aduna na kini nadawat nga hulga sa iyang kinabuhi sa 2019, apan dili hinuon consistent ang pagpadala og hulga.

Padayon pa nga gisubay ang cellphone ug laing Ipad ni Boligao kon kinsa ang mga contact niini ug mga dagan sa mensahe aron mas mopalig-on pa sa mga ebidensya batok sa ilang gisunod karon nga suspek.

Nakakuha na usab og kopya sa closed-circuit television (CCTV) sa crime scene ang kapulisan ug gipa-enhance pa kini aron pagklaro sa mga mamumuno, ilabi na kon asa padulong ang mga responsable sa pagpamusil.

Samtang di lang duha, apan upat ang anaa sa crime scene.

Nakuha sa CCTV footage nga gawas sa duha ka mga lalake nga luwan sa usa ka motorsiklo, diin ang nag-angkas ang nipusil, laing duha ka mga lalake sakay sa laing motorsiklo ang anaa ra duol sa nahitabuan kay nagsilbi nga lookout.

Gisubay na usab ang mga lugar nga gipang-adtuan ni Boligao sa wa pa siya niadto sa ihawan.