ORMOC CITY, Leyte -- "Zero incident" ang Dakbayan sa Ormoc maylabot sa pabuto ug indiscriminate firing atol sa pagsugat sa Bag-ong Tuig.
Matod ni Senior Fire Officer 1 Dino Daniel Barsomo, dako ang ilang pasalamat sa mga manindahay kay mi-cooperate kini sa mga pahiomangno sa awtoridad sa dili pagbaligya og mga bawal nga pabuto.
“Salamat gyud intawon sa Ginoo nga wala gyud ta'y na-record nga firecracker-related incidents,” matod ni Barsomo.
Base sa record sa Police Regional Office (PRO) Eastern Visayas, sa Ormoc City, duha lang ka dealers ang gitugotan kahuman nakakumpleto sa tanan nga rekisitos.
Kini mao ang Abobarar Store ug Maste Firecrackers and Pyrotechnic Products.
Matod ni Barsomo, nakakumpleto sa ilang mga rekisitos sa nasyonal ug lokal nga kagamahan ang duha ka dealers.
Ang kada dealer nanag-iya og daghan nga stalls ug matag stalls dunay Mayor’s Permit aron masiguro nga nakasunod kini sa safety standards.
Base sa record sa Ormoc City Bureau of Fire Protection, upat ka establismento ang nag-apply og fireworks display permit.
Kini mao ang Daisy Tan Residence, Sabin Resort Hotel, Gaisano Riverside ug Local Government Unit of Ormoc.
Matag establismento nagbayad og P1,049 sa BFP alang sa mga papeles ug permit sa ilang himuon nga fireworks display.
Aron masiguro ang kaluwasan, gitagaan usab og area sa lokal nga kagamhanan ang mga dealers diin gibutang kini sa lapad ug bakante nga yuta nga layo sa kabalayan ug likod kini sa fire station.
Wala usab naitala nga kaso sa indiscriminate firing ug naigo sa saag nga bala ang Ormoc City Police Office.
Matod ni Police Colonel Armel Gongona, sa una pa ang Pasko ug Bag-ong Tuig, gipatawag na ni Ormoc City Mayor Richard Gomez ang mga manindahay og pabuto, diha usab ang mga pulis, taga City Health Office, BFP ug mga barangay kapitan.
Gipahimangnoan ang mga dealers nga likayan ang pagbaligya og mga gidili nga pabuto kay di sila magduha duha sa pagdakop ug ipasira sa lokal nga kagamhanan ang tindahan ug tangtangan sa lisensya.
“Massive talaga ang information campaign. Masaya na rin kaming mga pulis kasi bilib po ako ditto sa Ormoc kasi may disiplina. May tiwala sila sa pamumuno ni Mayor Gomez. Siyempre may tiwala rin sila sa kapulisan na sumusunod lang tayo gusto ni Mayor para sa kaayusan,” matod ni Gongona.
Naglaum ang mga awtoridad nga pabilin nga malinawon ang matag sugat sa Pasko ug Bag-ong Tuig. (JKDP)