Rabacal: Relasyon sa RP ug US

KINAHANGLANGLANG atong estoriyahan pag-ayo kining atong relasyon tali sa Estados Unidos (US). Daghang nahingawa niining bag-ong panagbangi nato karon ug sa mga Amerikano tungod sa usa ka resolusyon nga entry ban amendment nga gi-apil sa 2020 US Budget nga gipirmahan ni President Donald Trump. Nagdili kini sa mga opisyal sa gobiyerno nga adunay kalabutan sa pagtanggong kang Sen. Leila de Lima. Gawas kanila ni Democratic Senators Dick Durbin ug Patrick Leahy, nga maoy mga nangamahan niining maong entry ban resolution, did-an usab sa pagsud sa Pilipinas ang laing Democratic senator nga mipaluyo usab niini nga s Edward Markey sa Massachusetts.

Agig tubag sa ilang resolusyon mihulga usab ang Malacanang nga dili pasudlon kining tulo ka mga senador, kon tinu-oron sa US State Department ang ilang entry ban. Gani mipasida-an ang atong gobiyerno nga kinahanglan na og Philippine visa ang mga Amerikano nga mo-anhi sa Pilipinas. Kini maoy angay natong bantayan. Daghan kaayong mga Pilipino nga nagpuyo ug nagtrabaho sa Amerika. Dili kaha ma-apektuhan ang ilang panarbaho didto? Daghan baya nga mga Amerikano nga ubos kaayo og pagtan-aw sa mga dili puti og panit. Dili kaha mosamut kining racial discrimination?

Bisan kon maingon nato nga pag-panghilabut kini sa atong judicial processes wala kini magpasabut nga duna nay direktamenteng gitumbok nga mga sad-an. Ang gusto sa mga senador mao nga buhi-an si Sen. De Lima o kaha himuon ang dinali-an ug katuho-an nga pagdungog sa iyang kaso. Inay nga mobawos dayon kita batok sa mga Amerikano nganong dili man nato imbitahun ang maong mga senador o kaha ang ilang legal staff sa pag-examine sa mga ebidensiya ug rekord sa kaso ni de Lima aron ilang makita nga nahatagan siya og credible trial? Wala na unta kinahanglana ang lalis ug mga hulga. Angay masayran sa mga Pilipino nga lima lang, sa 100 ka mga senador nga kontrolado sa mga Republicans, kining mga Democratic senators ang mipaluyo kang de Lima.

•••

Hinaut pang matukod na ang Metro Cebu Traffic Commission. Kinahanglang mag-apil kini sa Lapu-Lapu City, Mandaue City, Consolacion, Liloan sa amihanan ug Talisay sa habagatan. Bisan kon anaay tagsa-tagsa ka traffic board ang maong mga dapit apan dili sila epektibo kon dili maghiusa. Dugay na kining giproponer ni kanhi Citom chairman Bobbit Avila, apan wa kini mahinayon tungod sa pulitika. Importante ang hini-usang pagpatuman sa mga infrastructure projects nga makatabang sa hapsay nga dagan sa trapiko gawas sa mga estratihiya nga angay ipatuman sa mga ma-apektuhang local government unit (LGU). Gawas sa pundo gikan sa LGU, makatabang usab ang mga kongresista sa Cebu City, Mandaue, Lapu-Lapu, 5th district ug 1st district alang sa galastuhan sa mga inprastraktura. Hinaut pang matuman kini karong tuig 2020. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph