HUMAN na ang selebrasyon sa duha ka tag-as nga mga holidays, sa Pasko ug sa Bag-ong Tuig. Sa maong mga okasyon, manggawas ang lain-laing mga pagkaon. Unya kon mabusog na, mangita dayon og pahilis sa gikaon. Gawas dayon ang mga ilimnon nga makahubog.
Mao nang daghang mga estorya bahin sa mga hubog. Sama niadtong duha ka manag-amigo nga nag-inom sa usa ka bar. Nabantayan nila nga dunay customer nga ni-pass out – nakatug na. Ilang gipukaw. Nakamata pero di na makabarug. Busa ila na lang gihatod sa iyang balay.
Pag-abot sa balay sa maong tawo, ilang giingnan ang asawa, “Sus, hubog kaayong imong bana. Di na makabarug. Amo na lang gihatod.” Tubag sa asawa, “Hain man diay ang wheelchair ani niya?”
•••
Kadto siya di na makabarug pero moinom gihapon. Ang uban moinom hangtod nga di na makabarug. Duna say di mobarug kon duna pay imnunon. Ang akong higala nga si Eric Labrada nikomentaryo sa iyang amigo, “Bay, kada gabii na man kang moinom.” Tubag pa sa iyang amigo, “Di oy, moinom sab ko bisag adlaw.”
Lipay-lipay samtang mag-inom. Apan maglabad ang ulo inig ka ugma. Mao na ni ang hangover. Kinsay moinom nga wa makasinati og hangover? Kadto ra tingaling nakabasa sa nabasa ni Atty. Deolito Alvarez nga nag-ingon, “Avoid Hangover, Stay Drunk.”
Dako gyud ning isyu ang hangover. Gani tulo ka mga pelikula sa Hollywood nga giulohan og “Hangover” nikita man og $1.4 billion. Didto sa Zagreb, Croatia, gibuksan niadtong Disyembre ang usa ka “Museum of Hangovers.”
•••
Didto sa “Museum of Hangovers” makita ang mga butang ug makapahimuot nga mga estorya sa nanghitabo niadtong nangahubog ug sa paghimata nila wa na sila kahibawo kon unsay nahitabo. Ang uban mangita na sa ilang pustiso kay naapil og suka.
Ang hangover mao ang resulta sa “binge drinking” nga sagad maoy resulta niadtong moingon, “Let’s morning the night.” Maayo kon makalingaw ang kasinatian samtang hubog pa ug way nahimong kadaot sa kabtangan, sa kalawasan ug wa makapasakit sa laing tawo.
Sumala pa sa World Health Organization (WHO), ang sobra nga pag-inom sa alcohol misangpot sa kamatayon sa 3.3 milyones ka mga tawo matag tuig. Labaw pa ni sa hangover, labaw pa ni sa labad sa ulo nga masinati tungod sa pag-inom og alcohol.