SA KASUKO ni Presidente Rodrigo Duterte nga gipasar sa kongreso sa Estados Unidos ang resolusyon nga nag-ban sa mga opisyal sa Pilipinas nga responsable sa pagpabilanggo kang Senador Leila de Lima, gusto niya nga ang mga American national nga mosulod sa nasud pangayoan sab og visa.
Sa pagkakaron, ang tulo lang ka mga senador sa Estados Unidos nga nagpaluyo sa resolusyon nga nag-awhag sa pagbuhi kang de Lima ug pagpahigayon sa makiangayong husay ang gi-ban nga makasulod sa nasod.
Dunay mga higayon nga emosyonal ang Presidente sa iyang pamahayag, apan iya ra usab nga gibakwi. Hinaut pang di niya ni dayunon.
Dako og epekto sa turismo sa Pilipinas kon buhaton kini sa administrasyong Duterte tungod kay ang mga Kano ikatulo nga labing daghan sa mga turista sa nasod. Sa 2018, naa sa ikatulong dapit. Ang nag-una mao ang South Korea ug gisundan sa China.
Sa pagkakaron, nagsige og promote ang Pilipinas aron molambo pa og maayo ang turismo sa nasod. Kon turismo lang ang hisgutan, layo ra kaayo ang Pilipinas sa ubang mga nasod sa Southeast Asia.
Sa 2018, ang Thailand giduaw sa 38 million ka langyaw nga mga turista. Ang Indonesia dunay 12 million. Ang Pilipinas duna lay 7.1 million.
Linghod pa kon turismo ang hisgutan sa nasod. Unya mohimo pa og lakang ang kagamhanan nga makapaislag sa mga turista, kinsang mga dolyar gikinahanglan sa Pilipinas.
Kon unsa man ang baruganan sa upat ka mga senador, wa kini magpasabot nga mao usab kini ang panglantaw sa ubang mga Kano. Kon nainsulto ug nasakitan man si Duterte sa gibuhat sa pipila ka mga senador, di unta niya iangin ang tibuok Estados Unidos. Mas nagkinahanglan ang Pilipinas sa Estados Unidos sa natad sa turismo ug ekonomiya sa kinatibuk-an. Mao ni ang tinuod nga sitwasyon.