“GENERALLY peaceful.”
Kini ang kinatibuk-ang paghulagway ni Police Brigadier General Rolando Anduyan, director sa Police Regional Office Northern Mindanao, sa kasaulogan sa pagtabo sa Bag-ong Tuig niadtong Enero 1, 2020.
Walay na-record ang kapolisan may kalambigitan sa pabuto ug ingon man nagpabuto og armas atol mismo sa kasaulogan sa New Year.
Apan sa wala pa ang pagtabo sa New Year, duha ka kaso sa ilegal nga pagpabuto og armas ang natala, una sa probinsya sa Camiguin ug laing usa sa Bukidnon nga miresulta sa pagka-recover sa duha kalibre 45.
Ang suspetsado ang lango sa ilimnong makahubog atol sa insidente ug giandam na ang kaso nga haom kanila.
Niadto sab sa adlaw sa Bag-ong Tuig mga alas sais sa buntag, ubay-ubay ka mga ilegal nga pabuto ang nasakmit sa kapolisan diin sa Misamis Oriental lima ka bundle sa judas belt nasakmit sa Opol Police Station; duha ka boga sa Villanueva Police Station; 11 ka box ug 63 ka buok nga kwitis nasakmit sa Manticao; duha ka box ug 100 ka judas belt nasakmit sa Magsaysay.
Sa Ozamiz City mokabat 133 ka mga kahon sa pop pop; 14 packs sa corsair sa Tangub; usa ka box ug usa ka sawa nga pabuto nasakmit sab sa Valencia City, Bukidnon.
Ang pwersa sa kapolisan sa rehiyon nagdeploy og 1, 304 ka mga polis aron ipahimutang sa mga pampublikong lugar sama sa simbahan, malls, parke, terminal ug uban pang lugar.
Adunay mga kaso sa paghikog, pagpamusil, pagpanglugos, pagpangdunggab ang natala sa rehiyon apan giimbestigahan na kini karong panahona.
Mapasalamaton si Anduyan sa kinatibuk-ang pwersa sa kapolisan lakip sa katawhan nga nakigtambayayong aron makab-ot ang malinawon nga pagtabo sa tuig 2020.