SUSIHON una ni Gobernador Gwendolyn Garcia ang sitwasyon sa Cebu South Bus Terminal (CSBT) sa dili pa ipatuman ang renovation niini.
Nasuta base sa datos gikan sa buhatan ni Carmen Quijano, CSBT operations manager, nga gibana-bana nga moabot sa 50,000 ka mga pasahero ang mosulod-gawas sa terminal sa mga regular nga adlaw.
Samtang adunay dili mominus 500 ka bus ang nagbiyahe nga manukad sa CSBT paingon sa habatagang bahin sa Sugbo.
Gumikan sa maong sitwasyon maglisod sa pagpatuman sa renovation nga maoy tinguha sa gobernador ilabi na nga gikinahanglan nga adunay laing dapit nga temporaryong kabalhinan sa terminal ingon man ang posibilidad nga maghatag kini og kahasol sa mga pasahero.
Nagkanayon si Garcia nga mamahimo adunay gamayng trabaho nga himuon sa terminal sama pagpamintal, pag-rearrange sa interior ug uban pa.
“We wish to improve (the CSBT).That’s prime property and we are thinking of even inviting the private sector to come in on a PPP,” matod ni Garcia.
Sa laing bahin, giklaro sa gobernador nga walay labot pagdumala ang Kapitolyo sa North Bus Terminal.
“We are only handling Cebu South Bus Terminal and so og duna may mga complains sa North Bus ayaw intawn na iapil ang Cebu Provincial Government, kay lahi ang nag-handle ana.
But this is not to say that we are not also interested in looking for an area that we could set up a North Bus Terminal operation,” matod ni Garcia.
Aduna nay nakita nga luna ang gobernador nga posible unyang kabalhinan sa CSBT, ug gikatakda nga karong buwana sa higayon nga ma-finalize na, kini maoy priority ang pag-andam sa lugar nga balhinan sa dili pa itanyag ngadto sa pribadong sector alang sa planong public-private partnership (PPP). (ANV)