KAPITOLYO mokuha og job order (JO) nga mga doktor gumikan sa grabeng kakuwang sa mga mananambal sa probinsiya sa Sugbo.
Kini maoy pahibawo ni Gobernador Gwendolyn Garcia nga nagkinahanglan og dugang doktor alang sa mga pipila ka lungsod.
Iyang gipasalig nga sa kadtong interesado dili sila magmahay sa suholan nga ilang dawaton, bisan pa man nga ubos og gamay sa suholan niadtong mga regular.
“On the rates of the doctors, if we are to follow the same rates as what our regulars is receiving, naa’y imbalance kay mangluod ang regulars.
“Ngano man? Kay duna gud na silay withholding tax unya ang diri sa outsourced definitely mas gamay ang ilang deductions kon outsourced. So, we cannot put them on the same level. Kon ato sab paubsan, mubo na sab kaayo and there’s a shortage of doctors right now.
“So, the best thing that we could offer was to put them on a contract of service nga ang ilang take home would still be lower than kon regular sila. But, then it would be enough for them nga mo-compensate sa atong mga doctors considering industry rates karon,” pasabot ni Garcia.
Samtang walay problema sa gidaghanon sa nurses nga gipaubos sab sa outsourcing.
Gibutyag ni Dr. Sheila Faciol, Public Health Division chief, nga sa kasamtangan moabot sa 40 ka mga doktor ang gikinahanglan karon sa mga siyudad sa Danao, Bogo ug Carcar ug lungsod sa Balamban.
Sa matag lungsod nagkinahanglan og 10 ka mga doktor.
Sa pagkakaron gibutyag ni Faciol nga hapit na makompleto ang lista sa mga doktor sa Danao ug Balamban samtang upat pa lang ang mipakita og interes sa Carcar ug adunay tulo sa Bogo.
Gibutyag ni Faciol nga moabot sa P20,000 ngadto sa P22,000 ang suhol sa mga JO nga doktor sa probinsya.
Apan matod ni Garcia nga mopaubos sa performance evaluation ang madawat nga mga doktor.
Sa kadtong adunay maayong performance hayan i-regular sa trabaho.
“We are also closely watching the performance of these doctors because if magpakita sila og maayo nga performance, then definitely we can consider. Later on mo-graduate ni sila into becoming regular employees, so that also becomes like a test to them six months as job order,” matod ni Garcia.
Gawas sa pagpanawat na og aplikante nga mga doktor, gipaninguha usab karon sa probinsya nga mahuman sa mga kalungsuran ang pag sumiter sa mga rekisitos niini sanglit nagkaduol na ang pagpatuman sa Universal Health Care nga balaod (UHC).
Karong Enero 9, 2020 gikatakda nga mobisita si Health Secretary Francisco Duque III sa kapitolyo aron sa paglusad sa UHC sa lalawigan.
Diha kini ipahigayon sa Social Hall sa kapitolyo diin gilaraw nga tambongan kini sa mga Municipal Health officers, Health og NGO partners.
Positibo hinuon si Garcia sa mga possibleng i-anunsyo ni Duque atol sa maong kalihukan.
“I understand that Secretary Duque will be coming over to launch because I think he also looks at Cebu as the biggest pilot province kon diin ang UHC magsugod na ang implementation,” matod ni Garcia.