SA IKADUHANG adlaw sa 2020, moabot sa 70 ka balay ang naugdaw kun dul-an sa 400 ka indibidwal ang nawagtangan og balay atol sa pag-ulbo sa sunog sa sitio C. Padol, Barangay Duljo Fatima, dakbayan sa Sugbo, alas 4:35 sa hapon.
Matod ni Fire Senior Inspector Arnel Abella, ground commander sa Cebu City Fire Station, nga ilang gisusi karon ang taho nga nagsugod ang sunog sa balay sa usa ka Judith Campaner.
Ang balay giingon nga walay tawo atol sa pag-ulbo sa kayo. Gituohan nga nagbakasyon ang tibuok pamilya.
“Under investigation pa gyud kon unsay hinungdan sa pagkasunog,” asoy ni Abella.
Si Crisandy Muños, 19, kinsang panimay ang mao na untay malamoy sa kayo atol sa pagresponde sa kabomberuhan, nitug-an nga pasalamat sila nga napukaw pa sila.
Human nga halos tanang 12 ka sakop sa ilang banay, kasagaran mga bata, nangatulog, kay gipangkapoy sa pagsaulog sa Bag-ong Tuig.
“Maayo nalang lagi nga gipukaw mi sa ubang silingan nga sunog na daw sa among silingan. Gidali gyud namo among mga bata, dayon gidali paggawas among mga sinina,” saysay ni Muños sa Superbalita Cebu.
Giisa ang sunog sa fourth alarm alas 5:09 sa hapon ug sa alas 5:55 gideklarar kini nga under control.
Sa interview kang Abella, pasado alas 6 sa gabii, ila pang gisubay kon unsa ka tinuod nga adunay usa ka tawo nga na-missing. Samtang usa ka 16 anyos ang ilang gidali pagtabang kay nag-hyperventilate.
Ang sunog gibana-bana nga nagbilin og danyos nga mokantidad og P150,000 kay ang mga balay ginama sa light materials.
Matod ni Abella nga Enero 25 sa niaging tuig, nasunog usab ang mga balay sa maong dapit. Ang mga biktima sa sunog ang temporaryo nga gipahimutang sa Duljo gym. (FMD, BBT)