MOKONSIDERAR si Cebu City Mayor Edgardo Labella sa pagbalhin sa North Bus Terminal gikan sa Dakbayan sa Mandaue nganhi sa Siyudad sa Sugbo.
Kini human nidesisyon si Mandaue City Mayor Jonas Cortes nga dili na i-renew ang kontrata sa pag-abang sa Siyudad sa Sugbo sa maong terminal.
Sigon ni Labella nga kini usa sa iyang ituki tali kang Cortes kon sila magtagbo karong buwana.
Apan wa pa niya masuta kon asa nga dapita sa syudad ang balhinan sa terminal.
Makahuot sa trapiko
Nipahimangno si Cebu City Transportation Office spokesperson Ronnie Nadera nga kon madayon ang pagbalhin, magdahom na siya nga mas mograbe ang kahimtang sa traffic sa syudad sa Sugbo, apan amdam sila, ang CCTO nga magpakatap og enforcers sa maong lugar nga kabalhinan sa terminal aron pagpahapsay sa traffic.
Dungag ni Nadera nga daghan pa og mga butang nga angay ikonsiderar usa ibalhin ang terminal. Siya nipasabot nga kinahanglan og dakong lugar nga kabalhinan ang terminal sama sa North Reclamation Area diin adunay igong lugar alang sa mga bus.
Maayo usab kini kay naa nahimutang sa aminahang bahin sa syudad.
Mihangyo
Ang mga bus operator ug mga pasahero sa North Bus Terminal nihangyo nga i-konsiderar ang pagbalhin sa terminal human nidesisyon si Cortes.
Si Marisa Montecillo, usa sa mga bus operator sa Cebu North San Sebastian Cooperation, niingon nga mas gusto nila ang ilang nahimutangan karon tungod kay daghan na ang nakatuod.
Kon kini ibalhin, mas lisod na sa mga pasahero.
“Nakabati na mi ana. Mao bitaw ingon mi nga lisod kay para namo, okay naman mi ngari. Nindot ra og pwesto, walay samok,” saysay niya.
Dungag ni Montecillo nga kon sila pabalhinon sa Siyudad sa Sugbo, bentaha kini kanila sanglit madungagan sila og mga pasahero apan magsugakod sila sa traffic.
Ang Cebu North San Sebastian Cooperation anaay pito ka mga bus operator nga adunay 59 ka mga unit nga ilang gi-operate sa North Bus Terminal.
Kini adunay mga rota nga Borbon, Tabogon, Bogo, Catmon ug Sogod.
Sa iyang bahin, si Jolito Cabanes, admin officer sa Ceres Liner, niingon nga mag-agad siya sa desisyon sa ilang buhatan.
Samtang si Paz Solario, 64, usa ka pasahero nga gikan sa Daanbantayan, amihanang Sugbo, niingon nga mas maayo na ang kasamtangan nga nahimutangan sa terminal sanglit duol ra kini kon asa nahimutang ang ilang mga anak nga nagpuyo sa syudad sa Mandaue.
“Di lang oy kay layo na kaayo amo nya permi mi diri magsakay kay Daanbanatayan baya mi,” saysay ni Solario.
Apan alang kang Leah Calipay, taga Masbate ug nibisita sa Cebu sa panahon sa bakasyon, nga uyon ra siya sa pagbalhin sa terminal basta ang kabalhinan niini hamugaway alang sa mga pasahero. (JJL, KFD, JCT)