SUPERBALITA CEBU

4 patay sa pagpamusil

UPAT ang patay sa managlahing mga pagpamusil sa pagsugat ug atol sa Bag-ong Tuig.

Usa sa mga kaso may kalambigitan sa road rage kun away sa trapiko.

Kini naglambigit sa duha ka mga magsuong lalake nga gipamusil sa ilang gikalalis niadtong Miyerkules sa gabii sa national highway sa Barangay Poblacion, lungsod sa Consolacion, amihanang Sugbo.

Gituohang padung na mamauli sa ilang tagsa ka balay ang magsuong Rogelio, 53, taga Purok 6, Barangay Nangka sa mao nga lungsod ug Marcial Garcia, 50, taga sityo Cambyohan, Barangay Casili dihang nahitabo ang insidente sa ilang pagkatungod sa Fooda Hypermart.

Si Police Corporal Roel Aquino, duty desk officer sa Consolacion Police Station sa pakighinabi sa Superbalita Cebu, niingon nga ang magsuong Garcia ug nagbinugtong nga gunman nagkalalis labot sa trapiko.

Wa lang kini panumbalinga sa mga tawo.

“Ang manghud gyud maoy unang nakalaban, Sir, sa suspek nga sakay sa laing motor. Samtang miuwang ning maguwang hangtod sila na daw ang naglalis,” matod ni Aquino.

Wa magdugay, matod pa sa mga saksi ilang nadungggan ang mga buto sa armas de fuego hinungdan nga nagdinaganay ang mga tawo.

“Mao nalang dayon to, Sir, ang ilang nakita nga nahagba na sa dalan ang duha ka mga biktima pila ka tiil ang gilay-on,”dugang ni Aquino.

Si Rogelio wa na madala sa balay tambalanan kay namatay diha-diha samtang si Marcial kritikal nga gidala sa pribadong tambalanan.

Wa pa mailhi sa kapulisan ang killer samtang gisusi nila ang mga close circuit television (CCTV) camera.

Bangi

Personal nga bangi ang gitan-aw sa kapulisan sa Dakbayan sa Sugbo sa managlahi nga mga insidente sa pagpamusil, Miyerkules sa hapon, Enero 1, 2020.

Mga pasado alas 12 Miyerkules sa udto, patay ang usa ka kanhi anti-crime volunteer sa Mambaling Police Station samtang duha ang napagan sa pagpamusil sa Sityo Paradise 2, Barangay Kinasang-an ning dakbayan.

Si Police Sr. Master Sergeant Gregorio Gerames, desk officer sa Pardo Police Station, nga nahinabi sa Superbalita Cebu, niila sa namatay nga si Junrey Abapo, taga sa Sitio Paradise 3.

Samtang ang duha ka mga biktima nga napagan giila nga sila Jaylord Debalucos, 8, ug Allan Cabrera,hingkud, pulos taga Sityo Paradise 2.

Sa imbestigasyon sa Pardo Police Station, si Abapo naglakaw sa basketball court dihang giduol sa wa mailhing gunman nga naglakaw ra usab ug gipusil ang biktima.

Bisan kon samdan na nakadagan pa si Abapo, apan gisundan sa suspek ug giusban pagpusil nga miresulta usab sa pagkaangol nila ni Debalucos ug Cabrera.

Samtang si Abapo nga samdan sa ulo ug hawakan nahagba tungod sa usa ka tindahan.

Si Police Major Jhon Kareen Escober, hepe sa Pardo Police Station, nihulagway nga away personal ug pagpanimawos ang anggulo nga ilang unang gitan-aw nga motibo sa pagpatay sa biktima sanglit nga striker kaniadto a Mambaling Police si Abapo.

Tighatagan kini og impormasyon kon kinsa ang namaligya og drugas.

Samtang usa ka oras lang ang milabay lain na usab ang gipusil sa Sityo Naba, Barangay Mambaling ning siyudad.

Si Police Corporal Fred Carba, sa Mambaling Police Station, kinsa maoy naghawid sa kaso, niila sa biktima nga si Pedro Reyes, alyas Peter, 45, kinsa gipusil sulod sa sala sa iyang balay.

Matod pa ni Carba nga ang mga silingan ni Reyes nakurat sa panghitabo.

Dugang ni Carba nga si Reyes nag-abang lang sa balay sa Sityo Naba, apan lumad nga taga lungsod sa Dumanjug.

Ang kapulisan sa Mambaling dunay gisubay nga persons of interest karon.

Sa crime scene, ang mga personnel sa Scene of Crime Operation nakarekober usab og mga parapernalia nga gidudahang ginamit sa pagsuyop og shabu sa biktima.

Sila nagtuo nga kaila ra ni Reyes ang nipatay kaniya.

Gipatay sa konsehal

Barangay konsehal gipusasan human nakapusil patay sa iyang silingan atol sa pagsugat sa Bag-ong Tuig sa Brgy.Siotes, lungsud sa Tuburan.

Si Leolando Ticag, 38, minyo, konsehal sa maong dapit, gipasakaan na og kasong murder uban sa iyang silingan nga si Lenmark Obena, 25, ulitawo.

Si Ronald Tanjay, 33, dunay kapuyo, patay human nakaangkog samad pinusilan sa nawong ug dead-on-arrival sa tambalanan.

Si Patrolman Anthony Panilaga, sa Tuburan Police station nga nahinabi sa Superbalita Cebu, nagkanayon nga si Tanjay uban sa iyang kapuyo diha sa ilang balay nagpreparar sa ilang Noche Buena mga alas 7 sa gabii sa pagsugat sa Bag-ong Tuig.

Kalit nga niabot si Ticag sakay sa motorsiklo nga gimaniho ni Obena, way daghang pangutana, pugsanong nisulod sa balay ug gipusil ang biktima.

Human sa pagpamusi,l daling misakay sa nagpaabot nga motorsiklo, apan nadakpan sila sa follow up operation sa kapulisan.

Ang motibo gikatahong karaang panagbangi sa biktima ug konsehal, apan wa gibutyag sa kapulisan kon unsa ang gikasungian.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph