NAKATALA og duha ka firecracker-related injuries ang Davao Region, apil dinhi ang syete-anyos nga bata, subay sa rekord sa Department of Health (DOH-Davao) gikan Disyembre 21, 2019 ngadto sa Enero 2, 2020.
Si DOH Davao director Dra. Annabelle Yumang nagkanayon nga ang duha ka indibiduwal nga nakahiagom og angol nagagikan sa Davao del Norte ug Davao del Sur.
Ang syete-anyos nga taga Talaingod, Davao del Norte gidala ngadto sa Davao Medical Regional Center (DMRC) Disyembre 24 human maangol tungod sa bamboo canon.
Samtang Enero 1, 2020, usa ka 33-anyos nga lalaki ang nasamdan sab sa kamot human mabuthi og roman candle.
Sa pikas bahin, duha ka managhigala gidakop sa kapulisan sa Tugbok Police Station human nakalapas sa firecracker ban sa siyudad sa Davao.
Mga dinakpan mao sila si Daniel Clarito Carbajal, 18-anyos, ug Renel Saging Labrador, 19-anyos, mga molupyo sa Purok 1, Barangay Tugbok Proper, Tugbok District ning dakbayan.
Ang duha naaktuhang naggamit og improvised cannons samtang nagpatrolya ang kapulisan.
Nakuha gikan kanila ang duha ka improvised cannon nga ginama sa PVC pipe ug lata, ug usa ka spray plastic bottle sa flying tiger liquid.
Samtang ang Southern Philippines Medical Center way nadawat nga pasyente niadtong bag-ong tuig nga napagan sa pabuto. (Rhona Goc-ong Villariasa)