TRIPLE-double performance maoy gilihi ni LeBron James sa tuig 2020 nga maoy iyang ikawalo sa karon nga season sa dihang gipasawop sa Los Angeles Lakers ang Phoenix Suns kagahapon, Miyerkules (Huwebes sa Pilipinas).
Si James miyagyag og 31 puntos, 13 ka rebounds ug 12 ka assists sa ikatulong sunodsunod nga kadaugan sa Lakers. Sa first quarter pa lang ila nang napakita ang saktong dominasyon. Midugang si Anthony Davis og 26 puntos ug 11 ka rebounds.
Human mabiyai og 36 puntos, ang Suns sa kalit lang mipabuhagay og dakong rally sa fourth quarter ug mipahak sa labaw ngadto sa siete puntos na lang. Tungod niini, napugos ang Lakers sa pagbalik sa ilang starting unit aron sigurong masilyo ang kadaugan.
Si Kyle Kuzma mihagdaw og 19 puntos ug 18 ang nahipos ni Avery Bradley.
Taliwala sa kadaugan, gipadayag ni Davis nga kinahanglan adunay angay silang kat-onon sa maong duwa.
“We can’t allow ourselves to fall into a trap like that,” matod ni Davis. “You got to learn how to handle success within games.”
Ang Milwaukee Bucks, bisan tuod og wala sa ilang naandan nga kalantip, nakaipsot sa dakong hulga sa Minnesota Timberwolves, 106-104.
Sa naandan, si Giannis Antetokounmpo miladlad og 32 puntos nga gilamasan og 17 ka rebounds - iyang ika-30 nga double-double sa karon nga season.
“Not playing our best but still finding a way to win is good,” matod ni Bucks coach Mike Budenholzer. “But this isn’t the formula.”
Sa ilang tagsatagsa ka kadaugan, ang Lakers (27-7) ug Bucks (31-5) mipahugot sa ilang liderato sa tinagsa nilang conference ug nagkaduol na sa ilang paglangkat og luna alang sa playoffs.
Sa laing duwa, gipukan sa Knicks ang TrailBlazers, 117-93. Sa iyang unang pagbalik sa New York nga ning higayona isip sakop sa TrailBlazers, si Carmelo Anthony gihangop sa mga fans ug giabibahan.
Siya mitapos sa duwa nga may 26 puntos nga maoy pinakadako niyang puntos sukad sa paghibalik niya og duwa. Apan wa kini mapaigo, ug ang Knicks mao ra gihapon ang midaog.
Ang Orlando mimagic usab sa Washington, 122-101. (JBM)