TULISAN si Doming, way makalalis niana. Sa bata pa siya, mangawat siya aron makakaon matag adlaw. Mao nga mosulod ug moguwa siya sa sentro sa mga kabataan aron mahilakip sa programa sa gobyerno alang sa ilang rehabilitasyon. Apan naulitawo na lang siya naghingapin na hinuon ang iyang pagka kawatan. May nakaila siyang mga tawo sa dakbayan ug nahimo na siyang tulisan. Kinadak-an niyang giapilan sa pundok sa mga tulisan mao ang pagpanulis sa banko. Nasapian siya makadiyot ug giwaldas-waldas niya sa kahilayan ang salapi.
Dihay mga higayon nga makahinuktok siya sa iyang kinabuhi. Nangamatay ang iyang ginilkanan sa usa ka aksidente sa dalan. Ang nakadawat sa mga danyos mao ang iyang iyaan nga maoy nagsagop kaniya. Apan gihimo lang siyang ulipon ug kanunay gidagmalan. Wala usab siya pa-eskuylaha. Gidaugdaog ug gilupigan pa gyud siya sa iyang mga ig-agaw. Sugarol ang iyang iyaan ug ang na-bana niini dakong palahubog. Mao nga milayas siya sa ilang lungsod ug nahidagsa sa siyudad. Sa kagutom, mamunit siyag mga pagkaon sa basurahan. May naluoy kaniya ug kini mao ang mga batang kawatan sa dakbayan. Nakapuyo siya sa eskuwater nga dapit ug wala na matulog sa mga aseras sa siyudad. May makaon na siya kay nahiuban siya sa pundok sa mga dagkong kawatan.
Nakahunahuna si Doming nga moduaw sa ilang lungsod. Buot siyang masayod kon unsa nay nahitabo sa ilang balay ug yuta. Gipuy-an ba kini sa iyang mga kadugo? O giangkon na nga ilaha nang kabtangan?
Kapin sa upat ka oras ang biyahe paingon sa ilang lungsod sa Oslob. Sa nasudnong mga dalan may daghan na siyang nalantaw nga kausaban, Moderno na ang kinabuhi. Halos ang mga pinuy-anan sa matag lungsod kongkreto na. May mga subdibisyon na. May mga planta ug pabrika na. Nanurok sama sa mga uhong ang lainlaing mga patigayon ug industriya.
Nabalaka ug nabalisa si Doming kon unsa nay nahitabo sa ilang balay ug yuta.
Nahiabot siya sa ilang lungsod sa Oslob nga walay nakaila kaniya. Ug wala na siya masurprisa nga may lain nang nanag-iya sa ilang yuta. Nagbuntaog sa ilang yuta mao ang kinadak-ang mansiyon sa ilang dapit. Gipansg-iya kini sa usa ka drug lord. Ug kining drug lord mao ang iyang ig-agaw nga lalake nga si Arturo. .Sa bata pa siya, kulatado siya kanunay niini.
Nasayod na karon si Doming kon kinsay angayng tulison. Mibalik siya sa siyudad ug gisultihan niya ang pundok sa mga tulisan. Milihok sila sumala sa ilang plano.
Nahitabo ang pagpanulis. Misukol ang iyang ig-agaw ug napatay kini.
Gigamit ni Doming ang nakuha niyang salapi sa pagbawi sa ilang yuta. Naangkon na usab niya ang mansiyon. Nagtukod siyag legal nga mga negusyo. Nagbag-o na siya sa iyang kinabuhi. May pamilya na siya. Motabang na siya sa katawhan sa ilang lungsod.
Dihang gitulis ang usa sa iyang mga tindahan, nagpasalamat siya sa Diyos kay may bililhon siyang butang nga dili makawat ug matulis ni bisan kinsa. Ug kini mao ang iyang kausaban ug pagpahiduol niya sa gugma sa Diyos. Relihiyusa ang iyang asawa nga si Mameng ug maoy miagak ug migabay kaniya sa iyang kausaban. (Katapusan)