BISAN tulo na ka adlaw ang nilabay human nilugwa ang tuig 2020, motimbaya lang gihapon ko og ‘bulahang bag-ong tuig kanatong tanan!’
Pero di lang sab gyud ta magpaabot lang sa mga grasya. Molihok ug manlimbasog ta nga makab-ot ang mga butang nga atong gidamgo ug gitinguha nga giubanan sa pag-ampo sa kahitas-an.
Anà man gyud na. Mosunod ra man ta sa Iyang pagbuot.
•••
Di gyud mahimo nga way butóbutó no? Oki ra tingali adtong Pasko pero pagka Bag-ong Tuig, di matabang ang pagpabutó sa atong mga kaigsuonan!
Didto ko sa Quezon City (uban ang pamilyang Doños: Tiyo Ernesto, Tiya Vianing, Eric John, Junjun ug Jada Helene) sa pagsugat sa Bag-ong Tuig. Sabà ug daghang asó gyud ang palibot tungod sa pabutó.
Amping is the key lang gyud! Anà!
•••
Gawas sa pabuto, laing kalihukan nga lisod iwakli mao ang pag-videoke. Hapit kada balay dunay nagkanta.
Morag nag-gubat og videoke. Oki ra nang klaseha sa gubat: gubat sa mga nindot mokanta, sa mga sintunado ug yabag. Bisag unsang klaseha basta ang resulta: nalingaw ang tanan.
•••
Sa pagsulat nako ning lindog, duha pa gyud ka pelikula sa Metro Manila Film Festival ang akong natan-aw: Miracle on Cell No. 7 ug Mindanao.
Wa koy reklamo sa pagkapili ni Allen Dizon nga best actor batok kang Aga Muhlach. Di kay di maayo moarte si Aga. Aga Muhlach baya na nga nabantog sa kamaayo moarte.
Naa tingali sa istorya nagdaug ug sa pagpadagan niini gawas nga remake na sab gyud ang Miracle... samtang bag-o ug lab-as pa ang Mindanao. Mas katuho-an ang istorya sa Mindanao mao nga morag mas dulot sa dughan ang epekto sa arte ni Allen.
Sa Miracle..., dili sa mga esena ni Aga ko natandog. Didto ko sa esena nga wa na mapugngi ni John Arcilla isip Mang Johnny ang iyang gibati ug nipabuhagay kini sa iyang mga luha tungod sa kamingaw ug kahinugon sa iyang anak samtang nagtan-aw kang Zia Vigor (anak ni Aga dinhi).
Di na man tingali maisip nga spoiler kining akong gisulat kay duha na man ka semana human gisugdan ang filmfest ug daghan na usab tingali ang nakatan-aw sa mga pelikula.
Motan-aw pa ko sa mga nahibilin. Gianugnan lang ko nga dunay mga entrante sa festival nga wa na nako maabti kay gi-pullout na. Paet!