NANGITA ka ba og kasuroyan “to cool down” nga adunay “thrill and excitement”? Dia na ang tubag sa inyong kahinam nga ma-experience ang maong kalingawan.
Akong ipahibawo ninyo nga dia na sa Sugbo ang labing lapad o kinadak-an nga waterpark sa Central Visayas, ang Waterworld Cebu nahimutang sa Barangay Umapad, Mandaue City, Cebu.
Sa kadtong wa masuheto sa maong area duol kini sa tiilan sa Marcelo Fernan Bridge.
Features
Dili ka la-ayon sa imong pagsuway tungod kay aduna kiniy 10 ka extreme adrenaline rush slides ug siyam ka mga slides alang sa mga bata.
Ang matag slides adunay lain laing features, adunay slides angay sa tulo, duha ka tawo ug tagsa tagsa.
Aduna sab kini water playground diin anaay 14 ka lain-laing animal creatures nga ginama sa fiber glass.
Lakip sab sa lingaw nga mahatag sa Waterworld Cebu ang ilang lazy river nga anaay gilapdon nga upat ka metros ug 200 metros ang gilay-on. Angay kini sa kadtong ganahan nga magrelax nga magpalutaw-lutaw sakay ang floaters dad-on lang ka sa sulog sa maong lazy river.
Usa sab sa nindot nga kalingawan sa waterworld mao ang ilang Tsunami Wave Pool, ngalan pa lang daan adventure na kay ang maong wave pool adunay bawod nga susama sa tsunami.
Ang naasoyng pool adunay gilapdon nga 1,800 square meters nga wave pool nga maka-accommodate og 1,500 ka mga tawo.
Mao kini ang mga rides nga nindot suwayan sa Waterworld Cebu, ang Dare Drop, Mat Racer, Space Hole, Speed Shooter, Tornado, the Loop, Funtasea, Family Roller Coaster, Tsunami Wave pool ug River Rapids.
Safe
Tungod sa ka-extreme sa ubang slides, ang Waterworld Cebu adunay 27 ka mga lifeguards nga well trained sa Philippine Coast Guard ang mobantay sa mga guest.
Usa sab sa pasilidad sa maong waterpark ang clinic nga adunay duha ka personnel nga moresponde kon simbako (ipalayo) adunay dili kalikayan nga disgrasya ug aduna sab kini direct line sa first aid ambulance nga lima ka minuto lang maabot dayon sa maong lugar.
Sa matag slides adunay mo-assist usa ngadto sa tulo ka tawo sa dili ka pa itugotan nga makagamit sa maong slide kay gikinahanglang kang maminaw sa instructions og kon unsay angay ug dili angay buhaton.
Wala na silay waiver nga papirmahan sa dili pa musakay sa slide apan gisiguro sa management nga ang tanang kustomer sa Waterworld Cebu lakip sa ilang insurance.
Rates
Ang Waterworld Cebu kasamtangang nag-offer ug promo rates kung diin Lunes hangtod Biyernes ang entrance niini naa sa P400 ug kung Sabado, Dominggo o Holiday ang entrance fee niini naa sa P500.
Ang original price sa entrance kon weekdays P800 ug kung weekends o holiday P1000. Samtang ang mga bata nga ubos sa 3 feet libre.
Amenities
Aduna say gi-offer nga rooms ang Waterworld Cebu nga maka-accommodate kini ug 10-15 pax aduna na kini duha ka beds, private comfort room, TV with Cable ug Wi-Fi Connection.
Gitawag kini ug Aqua Suites ug ang original rate niini P3,500 ug ang promo rate niini tag P2,500.
Sa mga dili ganahan nga mag-rooms ug gusto lang nga maglantaw-lantaw, anaa sab silay mga tables nga tag P500 ug ang promo rate niini naa sa P400 nga adunay seating capacity nga 8-10 pax.
Kung ganahan sab mo nga dili lang marenta ug mga accomodation apan walay kabutangan sa mga gamit, anaa ra sab silay locker nga makasulod ug duha ka medium-sized backpack. Ang locker adunay rate nga P150 ug ang promo rate niini P100, kinahanglan pa sab mag-deposit ug laing P100 apan refundable sa imong paggawas.
Aduna sab kini tulo ka function halls nga mamahimo sab nga rentahan sa kung adunay mga events nga gustong ipahigayon sa maong waterpark.
Ang mga promo rates until further notice.
Pagkaon
Adunay restaurant ang Waterworld Cebu nga nag-offer ug nagkalain-laing nga international cuisine sama sa Filipino, American, Chinese, Korean and Japanese nga luto.
Ang presyo sa mga pagkaon anaa sa P100 pataas.
Adunay corkage fee kung magdala og pagkaon o mga ilimnon sama sa tubig, juice ug uban pa sa sulod.
Ang Waterworld Cebu usa ka lugar kung diin sigurado nga malingaw dili lang ang mga bata apan ang tinuok pamilya.
Kining maong waterpark day-use lang og abli gikan sa 9:00 sa buntag ngadto na sa 5:00 sa hapon.
Alang sa dugang pang kasayuran kabahin sa maong waterpark mamahimo sab kamo nga mo-follow sa ilang Facebook fan page nga Waterworld Cebu.