Oil leak sa dan gibasol sa mga disgrasya sa coastal road

CEBU. Kuha sa CCTV ang lima ka motorista nga nalamba tungod sa kadanlog sa dalan, Sa lima ka motorista nga nalamba, wala ra'y nagrabehan. Igo ra sila nibakud, nipatindog sa ilang motorsiklo ug nipadayon sa biyahe. (Hulagway iya sa Talisay City PIO)
CEBU. Kuha sa CCTV ang lima ka motorista nga nalamba tungod sa kadanlog sa dalan, Sa lima ka motorista nga nalamba, wala ra'y nagrabehan. Igo ra sila nibakud, nipatindog sa ilang motorsiklo ug nipadayon sa biyahe. (Hulagway iya sa Talisay City PIO)

LIMA ka mga motorista nangalamba sa may Cebu South Coastal Road sa habig sa Dakbayan sa Talisay, pasado alas 6, Biyernes sa buntag, Enero 3, tungod sa kadangog sa dan.

Apan di tungod sa pag-uwan-uwan kundi tungod sa krudo nga nagpasad sa dan.

Nagsugod kini sa karsada tungod sa Evergreen Cemetery sa Barangay Tangke, hangtod na sa may eskina dan Laray, Barangay San Roque.

Dali nga gisubay sa City of Talisay Traffic Operations Development Authority (CT-TODA) kon unsay hinungdan niini.

Gisubay sa mga sakop sa CT-TODA ang traces sa krudo, hangtud nga nakit-an nila ang usa ka unit sa MY BUS diha na sa usa ka gasoline station sa Barangay Cansojong.

Ang bus gimaneho sa usa ka Bryan Teaño, 37. Sa dihang gipangutana sa mga sakop sa CT-TODA, giingong wa motubag.

“Amo gisubay kon asa ang tinulo hangtud nga ilang nakit-an ang My Bus nga gisud nila sa gasoline station. Gipadaplin, murag ilang gitago ba. So, didto namo nasuta nga didto gyud diay niya gikan ang katong leak, kay makita man sad sa pictures,” saysay ni Jonathan Tumulak, pangulo sa CT-TODA.

Dugang ni Tumulak nga base usab sa ilang nakita sa pag-review sa closed-circuit Television (CCTV) nga gipamuntar sa highway, nakita nga kahibawo ang driver kon unsay nahitabo sa iyang gimaneho nga bus.

“Kay giduol gyud siya og laing truck driver nga nagdagan. Gipahibaw siya unya gitudlo pa gyud ang iyang ligid, kon asa dapit nagtulo ang krudo. Pero human adto, wala ra siya manumbaling, drive kay drive lang siya,” asoy ni Tumulak.

Hinungdan nga giisyuhan nila si Teaño og Temporary Operator’s Permit (TOP) samtang gi-impound usab ang unit.

Lakip na usab sa giisyu ang reckless driving ug defective parts sa gimaneho nga sakyanan.

Aduna usay tulubagon ang operator sa MY BUS.

Matod ni Tumulak nga sa inisyal nga communication gikan sa MY BUS, giingon nga magpadala kini og sulat pagpangayo og pasaylo sa Kagamhanan sa Talisay ug pagpasabot kon unsay nahitabo sa ilang sakyanan.

Motabang ang CT-TODA sa pag-facilitate sa mga motorsita nga nalamba kon ugaling moreklamo og kasakit sa ilang lawas ug buot ba nga magpatambal o unsay danyos sa ilang mga motorsiklo.

Matod ni Tumulak nga sa lima ka mga motorista nga nalamba, wa ra hinuon nagrabehan.

Igo ra sila nibakud, nipatindog sa ilang motorsiklo ug nipadayon sa byahe.

Dali usab nga gibutangan sa mga sakop sa CT-TODA og ginabas sa kahoy ug gilimpyuhan ang dan nga danlogaron wa nay lain pang madisgrasya.

Apan di lang kini unang higayon. Sa tunga-tunga a miaging tuig, usa ka truck nga nag-leak usab ang krudo ang nakaingon nga nangalamba ang mga nagsunod niini nga motorista.

“Ang ato lang unta pahinumdom nato sa mga sakyanan ilabi na gyud sa mga truck nga moagi diha sa SRP, nga kinahanglan hugtan gyud nila ang ilang preventive maintenance sa ilang mga sakyanan kay para malikayan ang susama nga aksidente,” hangyo ni Tumulak.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph