BISA’G wala ang duha sa ilang mga sinaligan, ang hosts Dallas Mavericks nakamaneho gihapon paglampaso sa Brooklyn Nets, 123-111, kagahapon sa National Basketball Association (NBA) sa pagpangulo sa ilang batan-ong superstar nga si Luka Doncic.
Si Doncic, kinsa maoy 2019 Rookie of the Year awardee, nagpakatap og 31 puntos aron ilikay ang Mavericks sa labing una unta niining tulo ka sunodsunod nga kapildihan sa season.
Ang Mavericks, nga ningkombati nga wala sila si 7’3’ forward Kristap Porzingis ug shooting guard Tim Hardaway, mingsaka sa 22-12 nga rekord.
Si Porzingis bag-uhay lang nakasinati og angol sa iyang tuhod samtang si Hardaway padayon pang nagpaalim sa angol sa iyang bagtak.
Sa dihang nipahuway si Doncic sa tungatungang bahin sa 3rd quarter, si Seith Curry maoy miagak sa Mavericks ug ning maong higayon niya gimugna ang 15 sa iyang kinatibuk-ang 25 puntos nga gibuwakan og lima ka three-point shots.
“A lot of guys can make plays and we never know who’s going to get the touches or the shots that night other than Luka,” asoy ni Curry, manghod ni Golden State Warriors superstar Stephen Curry.
“It’s fun to play. Every night it seems like somebody different is making a big impact.”
Maayo sab nakaduwa alang sa Mavericks mao si Maxi Kleber, kinsa nagpauwan og iyang season-high nga 18 puntos.
Ang Nets, nga nahagbong sa 16-17 nga baraha, gipangulohan ni Spencer Dinwiddie pinaagi sa iyang 19 puntos.
Ang Nets aduna pa’y laing unom ka mga magduduwa nga nakahimo og dobleng numero nga puntos.
“We didn’t get a stop,” asoy ni Dinwiddie. “Obviously, that’s what kind of ballooned their lead and we obviously didn’t make enough shots to keep pace.”
Gidugkatan ni Doncic ang pagsutoy sa opensa sa Mavericks sa tungatungang bahin sa 4th quarter pinaagi sa 13-4 run nga nakahatag kanila og 116-104 nga labaw sa nahabiling 3:48 minutos.
“The style we play offensively is very empowered to the players,” asoy ni Dallas coach Rick Carlisle.
“When you get a guy like Seth that’s hot, they just need to find him.”
Sa laing mga duwa, ningdaog ang Sacramento Kings batok Memphis Grizzlies, 128-123, Los Angeles Clippers batok Detriot Pistons, 126-112, Minnesota Timberwolves batok Golden State Warriors, 99-84, Oklahoma City Thunder batok Chicago Bulls, 102-95, Charlotte Hornets batok Cleveland Cavaliers, 109-106, Miami Heat batok Toronto Raptors, 84-76, ug Denver Nuggets batok Indiana Pacers, 124-116. (AP, ESL)