MOASDANG og balik ang kanhi world title contender nga si Filipino Jonas Sultan sa South Africa aron makigbatok kang South African prospect Ricardo Malajika karong Pebrero 29, 2020 sa alang sa inilugay sa bakanteng International Boxing Federation (IBF) Intercontinental super flyweight belt sa Emperor’s Palace sa Johannesburg.
Mahinungdanon kini nga away alang sa ALA fighter gumikan kay kon modaog siya, hayan mahibalik siya sa world rankings nga posibleng maghatag kaniya og laing oportunidad aron makaaway og balik alang sa world title.
Si Sultan unang miaway alang sa world title niadtong 2018 diin gisuwayan niya’g ilog ang korona sa kababayang si IBF super flyweight champion Jerwin Ancajas sa Fresno, California.
Apan niadtong higayuna, napakyas si Sultan pinaagi sa unanimous decision.
Gipasabot ni ALA head trainer Edito Villamor nga nagkinahanglang makarehistro si Sultan og makapaukyab nga kadaugan batok kang Malajika aron makakuha og dakong atensyon.
“Kinahanglang modaog siya pinaagi sa knockout pareha sa iyang gihimo sa igsuon ni (Zolani) Tete,” asoy ni Villamor sa interbyu sa Sun.Star Cebu.
Gitumbok ni Villamor mao si Makazole Tete, kinsa gipaundang ni Sultan sa 2nd round sa ilang IBF Intercontinental super flyweight title fight sa South Africa niadtong 2016.
Si Sultan adunay 16-5, 10KOs nga rekord samtang si Mahalika naghupot og 6-0, 5KOs nga rekord.
Bisan miuli siya sa iyang yutang natawhan sa Zamboanga, wala’y hunong sa pag-training si Sultan hinungdan nga anaa gihapon kini sa saktong kondisyon. Bag-uhay lang siyang mibalik sa ALA gym.
Nakatakdang makig-sparring si Sultan sa kanhi world champion nga si Milan Melindo ug hasta nila ni KJ Cataraja ug Esneth Domingo. (EKA, ESL)