PADAYON pang giobserbahan sulod sa balay tambalanan ang kahimtang sa usa ka 21-anyos nga babaye nga giingong nisulay og pakamatay sulod sa usa ka inilang hotel sa dakbayan sa Davao niadtong Huwebes sa hapon, Enero 2.
Sumala pa nga nagpadala og imbestigador ang San Pedro Police Station ngadto sa usa ka hotel sa may dalang San Pedro aron nga molusad og imbestigasyon bahin sa giingong pagsuway og pakamatay nga gitaho sa Mobile 18.
Subay sa imbestigasyon, nasayran nga ang biktima ni-check in Room No. 306 sa maong hotel.
Samtang tua siya sa hotel, nag-video call siya pinaagi sa iyang cellular phone uban sa iyang higala aron nga pahibaw-on kini sa iyang intensiyon nga magpakamatay pinaagi sa paglala og “Salicylic Acid” hinungdan nga daling nanawag ang iyang higala ngadto sa front desk sa hotel aron nga pahibaw-on kini sa pagpakamatay sa biktima sa maong lawak.
Sa pagsusi sa mga personahe sa hotel, ilang nakita ang biktima nga dalaga ug molupyo sa may Barangay Catalunan Grande ning dakbayan nagbuy-od na sa iyang kama apan duna pay panimuot hinungdan nga dali silang nanawag og tabang medical.
Natunong nga ang Mobile 18 sa kapulisan sa San Pedro PNP naglusad og mobile patrol duol sa nahisgutang lugar hinungdan nga dali silang nakaresponde. Daling gihatud ang biktima ngadto sa Davao Doctor’s Hospital aron nga patambalan.
Sa pagsuwat ning balita, ang biktima gipailawom pa sa pag-obserba pinaagi ni Dra. Shelee Sosa.
Mga awtoridad nagpasidaan nga kon kinsa kadtong nanginahanglan og tabang, ilabi na gyud sa susamang sitwasiyon, tawag gilayon sa Suicide Prevention Hotlines sa Department of Health (DOH) sa mga mobile number 0917-899-8727 (USAP) ug 0917-989-8727 (USAP).