ANG dagway ni Presidente Rodrigo Duterte
mipilit sa tabanog ko, nagkiaykiay sa bag-ong tuig,
apan di makasayaw kay bakol. Mao nga nagpakilimos
na lang sa mga buto-buto nga nagpaka-paka
sa kadalanan nga gisulong ni Don Quijote alang
sa kataw-anang rebolusyonaryo sa mga komunista.
Gubat didto, gubat diri! Samtang may nag-ilaid
sa tumang kagutom ug gilaygay sa lainlaing mga sakit
ug kamatayon. Mao nga ang tabanog ko sa kahanginan
nahagtos ug mitibugsok sa yuta. Nangabali ang mga
tigbayon ug dugukan lakip na ang mga taptap niini.
Nakasaad ko nga mokiaykiay sa bag-ong tuig.
Ang bag-ong mga kinabuhi nila ni Jose Rizal
ug Andres Bonifacio mogakos sa akong tabanog
ug mokapaykapay uban sa mga bag-ong salingsing
sa kinabuhi. Lupad, lupad, bag-o ug lig-on kong
tabanog! Modupa ka sa kahanginan ug mangaliya
sa Bag-ong Herusalem! Amen!