MAS tutukan karon sa African Swine Fever (ASF) Task Force sa Kapitolyo ang pag-monitor sa mga pantalan ingon man sa mga airport human masakmit nga mga ham nga gamiton unta sa pagsaulog sa Pasko og Bag-ong Tuig gikan sa Luzon.
Moabot kini 3,000 kilos nga gikarga sa usa ka cargo plane nga nitugpa sa Mactan Cebu International Airport (MCIA)niadtong Disyembre 12, 2019.
Mibalor kini og P1.3 milyunes.
Matod ni Dr. Mary Rose Vincoy nga karong 2020, buot nila nga mas pahugtan pa ang monitoring sa Regional Veterinary Quarantine Office (RVQC) sa pagsusi sa mga bagahe sa mga pasahero sanglit posibleng mas modaghan pa kini human milibkas na ang pipila ka mga rehiyon nga nagpalibot sa Central Visayas sa ilang pork ban gikan sa Luzon.
Nagsugod ang pag-ban sa mga produktong baboy nga apektado sa ASF nga mosulod sa Sugbo niadtong Agusto 20, 2019.
Sulod sa upat ka buwan may moabot sa 5, 478. 42 kilos nga pork products ang nasakmit sa ASF task force sa kamerkadohan, convenience stores ingon man sa Pier 1 ngadto na sa singko sa Siyudad sa sugbo. Mobalor kini og P1, 439, 209. 63. (ANV)