LAIN na usab nga minilyon nga balor sa shabu ang nasakmit sa mga pulis sa Dakbayan sa Sugbo ning pagsulod pa lang sa Enero sa 2020.
Si Police Capt. Janelito Marquez, hepe sa Guadalupe Police Station, uban ang ang mga operatiba sa Labangon Police Station, nangu sa buy-bust pasado alas 11 Huwebes sa gabii sa Sityo Capaculan, Barangay Tisa, Siyudad sa Sugbo.
Ang nasikop mao si Nicanor Cabornay, 52, kasamtangang trabahante sa barangay isip tigbantay sa molabay og basurat.
Matod pa ni Marquez nga ang ilang target usa ka Opong, pag-umangkon ni Caburnay, apan nilakaw sa wa pa ang buy-bust.
“Actually, ganiha si Cabornay maoy nidunol sa usa ka bulto nga shabu nga gipalit sa among puseur buyer ug wa mi magdahum nga dunay usa pa ka dakong putos nga among nakuha,”matod ni Marquez.
Gibana-bana nga kapin duha ka kilo nga shabu ang nasakmit gikan kang Cabornay nga mobalor og P13 milyunes.
Dugang ni Marquez nga ilang gikonsiderar si Cabornay nga ana sa city level high value target drug personality.
Si Cabornay nanghimakak nga iya ang drugs kay iya kini kini sa iyang pag-umangkon nga si Opong.
“Ako kabalo ko nga manuwaay na sila pero wala ko kabalo, Srr,ingon ana ka daghan nga shabu,”sulti ni Cabornay.
Si Tisa barangay councilor Bernardo Ada Lapeña nakurat sa pagkahibawo nga ilang sakop sa barangay.
Nikompirmar si Lapeña nga si Cabornay naasayn sa pagbantay sa manglabay og basura sa ilang dapit aron mogiya kon asa ipanglabay.
Matod pa ni Lapeña nga P2,000 matag bulan nga honorarium ang gidawat ni Cabornay, apan sila sa barangay nahibulong nga dagko ang pusta niini kon mosugal sa sabong sa manok.
Si Lapeña nikompirmar nga si Opong naa sa listahan sa drugas sa ilang dapit. Sa laing anti illegal drugs operation sa Abellana Police Station, laing duha ka mga tawo nadakpan.
Si Police Major Elizandro Quijano, hepe, nangu sa buy-bust sa dan Escario, Barangay Kamputhaw. (BBT)