GITAKDA sa Miami Heat karong Pebrero 22 ang pagparetiro sa No.3 jersey sa usa sa labing maayo nilang magduduwa nga si Dwyane Wade atol sa ilang pag-host sa Cleveland Cavaliers sa National Basketball Association (NBA) sa American Airlines Arena.
Ang No.3 jersey ni Wade maoy ikalima nga iretiro sa Heat sunod sa No. 33 ni Alonzo Mourning, No. 10 ni Tim Hardaway, No. 32 ni Shaquille O’Neal ug No. 1 ni Chris Bosh.
Nagpasabot kini nga wala na’y bisan kinsa nga magduduwa ang magamit sa No.3 hangtod sa kahangturan.
Si Wade miretiro pagtiklop sa miaging season isip maoy franchise all-time leading scorer. Natabangan niya og dako ang Heat sa pagsakmit sa tanang tulo ka mga titulo niini niadtong 2006, 2012 ug 2013.
Sakop si Wade sa gikatawag nga Big Three sa Heat diin kauban niya sila si Bosh ug LeBron James. (AFP. ESL)