KUHAON kaha og balik sa University of Cebu (UC) Webmasters ang usa ka pamilyar nga personalidad aron maoy molingkod isip bag-o nilang headcoach?
Nalantawan nga dako ang posibilidad nga mao kini ang mahitabo gumikan kay hugot nga gikonsiderar sa Webmasters ang pagkuha kang Atty. Kern Sesante aron mohulip kang multi-titled coach Raul “Yayoy” Alcoseba.
Sa miagi lang buwan naputol ang pagkahilambigit ni Alcoseba sa Webmasters.
Mismong si UC team manager Atty. Baldomero Estenzo ang mikompirmar ning maong kalambuan.
“He is a good role model for the players. He was our captain ball before and he was a top placer in the Customs Board Examination and a lawyer who finished his Law Course in UC,” pasabot ni Estenzo.
Si Sesante katapusang nagiya sa Webmasters niadtong 2016 una siya gipulihan ni Alcoseba.
Ubos sa paggiya ni Alcoseba, nakasulod ang Webmasters sa finals sa usa ka higayon ug semi-finals sulod sa duha ka mga higayon sa Cebu Schools Athletic Foundation Inc. (CESAFI) basketball event.
Apan human napakyas ang Webmasters pagsulod sa semis sa miaging season, ang team management namasin nga mosubay og bag-ong direksyon ug mao kini ang nag-abli sa posibleng pagbalik ni Sesante.
Gipasabot ni Estenzo, nga ang tanang posisyon sa team– gikan sa magduduwa ngadto sa coaching staff – pulos wala’y kaseguroan ug adunay posibilidad nga mailisdan ang bisan kinsa alang sa umaabot nilang kampanya sa Cesafi. (JNP, ESL)