SUD sa pito ka tuig, nagtudlo sa pre-school sa ilang barangay si Cirilin Babatuan.
Apan giingong tungod sa pulitika, giilisan siya.
“Mao toy nakapa-trigger nako nga magmaestra jud ko kay nasakitan kaayo ko pagkawala sa akong trabaho,” padayag ni Cirilin.
Niadtong Marso 15, 2019, sa edad nga 52, nakab-ot ni Cirilin ang usa sa mga kalampusan sa iyang kinabuhi dihang nakahuman siya og eskwela sa kursong Bachelor of Science in Secondary Education major in English sa St. Paul College Foundation Inc. sa Barangay Bulacao, siyudad sa Sugbo.
Gawas niini, apil usab siya sa Dean’s list. Una siya nakaeskwela og kursong nursing sa dihang batan-on pa kini apan matod niya wa siya makasubay sa insaktong dalan.
Niini, niagi siya og sayo nga responsibilidad ug aron maka-sustain sa panginahanglan, nagtrabaho siya sa Taiwan isip caregiver sud sa tulo ka tuig.
Human sa iyang kontrata, nakasuway siya og trabaho isip researcher sa usa ka market research diin bisag asa nga lugar siya na-assigned. Hangtod nakatudlo siya isip pre-school teacher sa ilang barangay.
Nakatiwas siya og eskwela pinaagi sa tabang sa iyang pamilya labi na sa ilang kamaguwangan nga igsuon nga si Neneth Babatuan-Cavitt nga tua sa Estados Unidos.
Niadtong 2015, nibalik og tungha sa kolehiyo si Cirilin.
Si Neneth nitabang usab pagpahuman og eskwela sa kamaguwangan nga anak ni Cirilin nga si Wilce Enriquez, kinsa usa na ka lisensiyado nga electrical engineer, ug sa ubang mga pag-umangkon niini.
Ang laing anak ni Cirilin nga si Joshua David kay nagtrabaho na ug duna nay kaugalingon nga pamilya.
Alang kang Cirilin, usa ka sense of fulfillment ang iyang gibati kay natuman ang iyang pangandoy dihang nakahuman siya og eskwela sa kolehiyo.
Niadtong Disyembre 1, usa ka sayo nga pinaskohan gikan sa kahitas-an ang iyang nadawat gumikan kay nakapasar siya sa Licensure Examination for Teachers (LET).
“Mintras buhi pa, age doesn’t matter jud nga ma-achieve ang damgo,” pagdasig ni Cirilin sa ubang mga tawo nga wa pa makahuman og eskwela. (SCG)