SUPERBALITA CEBU

Sugilanon: Bag-ong tuig, bag-ong inspirasyon

PIPILA na lang ka takna ang nahibilin sa daang tuig ug ihimugso na ang bag-ong tuig. Mao kini mensahe sa mga panagsang buto-buto sa lain-laing matang sa mga firework ug sa mga awit gikan sa mga sound system sa kabalayan. Apan imbis nga maglipay, kabalaka ang mihakop sa galamhan sa magtiayong Nelson–Tessie.Kini human nila hisayri nga si Sheen-Sheen ang babayeng mabdos nga mobuwan pa sukad nag-abang sa boarding house tupad sa ilang balay gikuha na sa iyang ginikanan kuyog sa nakapabuntis kaniya. Sayod sila nga dakog gusto si Rocksjake, ilang anak, nga ilang gituohang nagbag-og alang kang Sheen-Sheen. Ug ang dalaga maoy hinungdan sa pagbag-o niini sa kinabuhi. Sa laktod siya, si Sheen-Sheen, maoy inspirasyon sa ilang anak..

“Buta man tingali nang tawhana.” maoy komedya ni Rocksjake dihang sa unang higayon misaysay si Sheen-Sheen sa iyang kahimtang. “Kaguwapa nimo, unya ingnon ka lang ana niya? Kawala gud niyay batasan!”

“Aw, ikaw man diay naay diperensyas mata, Rocks.” ni Sheen-Sheen dayong tukikig katawa. “Basig maong wala siya manubag kay kita man maoy forever.” tiaw sa ulitawo dalang tinuod.

‘Tulog na, basig wa pa ka katugpa.” bawos sa dalaga nga ingon og dugay na silang managbarkada.

Mao kadto ang sinugdanan sa ilang panagsuod. Ug wala igsapayan ni Sheen-Sheen ang pagkabisyuso sa ulitawo. Ingon og wala lang kini mahadlok nga sulod ug gawas lang si Rockjake sa bilanggoan sa lainlaing salaod. Sa niaging buwan nadakpan man gani kini nga nag-pot session kauban ang mga barkadang mga adik usab.

Apan karon nahimatikdan sa iyang ginikanan ang kadako sa iyang kausaban.Nadayag na ang kaambong niini nga hagbay rang gisalimbungan sa hapit way panudlay ug way kaligo nga panagway.Ug ang nakahatag nilag kalipay kay aduna na kini direksiyon sa kinabuhi.Nalantawan nilang sa kaulahiay magamit ra gyud ang iyang kurso nga HRM kay nadawat man siya nga pastry chef sa usa ka international hotel. Nakagraduwar tinuod kinig kurso apan mahulog nga pinalit ang maong diploma. Sayod sila nga kon dili pa nila suod ang dean sa HRM department di gyud unta sila makahimog tunol og mga padangog sa mga propesor nga nag-handle sa mga subject niini. Nabatyagan nila karon ang bag-ong paglaom alang kang Rocksjake. Kay sumala sa gisulti niini dako kinig suweldo. Nakapasalamat sila sa Ginuo tungod sa paghiabot ni Sheen-Sheen sa ilang dapit. Sa ilang paminaw hapit na moabot ang adlaw nga sila mahaw-as sa pagkalubong sa utang.

“Okey ra man tingali nga mahimong ‘salvador del mundo’ ang atong anak!” Kausa nagka-estoryahay ang magtiayon.

“Uy! Angel touching ground na si Sheen-Sheen kang Rocksjake!” dayeg ni Tessie. Ingon og sa wala motuhop sa kasingkasing sa ginikanan ni Rocksjake ang kamaya sa palibot tungod kay pipila na lang ka oras sugaton na sa kalibutan ang nagdangadanga nga bag-ong tuig. Gisanapan ang ilang galamhan karon sa kabalaka, kay segurado gyung mobalik ang ilang anak sa naandan niining taras.

Diha sila sa maong kahimtang dihang naabli ang pultahan sa lawak ni Rocksjake. Nakita nila kining nag-uniporme alang sa trabaho.Nagsagol ang ilang kalipay ug kahingawa sa ilang nasaksihan.

“Dili diay tibuok ang atong pamilya nga mosugat sa New Year, Dong?” wala sa kaugalingon nga nalitok kini ni Tessie.

“Pa-dyutihon man god ko, Ma, Pa. kay daghan kaayong guest ang hotel karon,” ni Rocksjake dayong punit sa iyang backpack. “Busa pasensyahi lang usa ko ninyo. Mobawi ra unya ko inig dawat nakos una kong sweldo.”

“Ay, salamat sa Diyos! Abi ko mag...” Wala matiwas ni Tessie ang buot niyang isulti kay gigakos siya sa iyang anak.

“Di ko maapektohan sa pagtalikod ni Sheen-Sheen, Mama, tungod kay tua na siya sa tinuod nga nanag-iya niya,” ni Rocksjake nga nagpahiyom.

“Usa pa, aduna na kay bag-ong inspirasyon? Aduna na kay bag-ong uyab?”

“Wala man,” ni Rocksjake. “Kamo maoy akong bag-ong inspirasyon, Ma. Gusto kong makabawi sa kagul-anan nga akong nahatag kaninyo kaniadto.” (Katapusan)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph