KON naanad kang sayo momata aron motrabaho o moeskwela, chances kay imong nakit-an ang mga tawo nga nag-jogging o nagbiseklita isip ehersisyo. Bisan ako makakita basta sayo ko mobangon ug molakaw.
Di lang kay sa karsada ka makakita, daghan sab ang naa sa mga gym nagpasingot. Kini taliwa sa daghang mga pagkaon nga sagad di maayo alang sa panglawas. Nagkadaghan man gud ang fastfood.
Gawas sa di maayong pagkaon, ang trabaho karon nagkagrabe ang pressure inubanan sa taas nga oras, hinungdan nga daghan ang di na makagahin og higayon sa pagpasingot.
Tungod sa mga online game ug social media, daghan usab ang naa na lang nagyampungad sa pagkuting kuting sa ilang cellphones, tablet ug computer.
Mao ni ang opposite nga mga kinabuhi. Apan nakahibawo ka ba nga mahimo rang mag social media ka at the same time mag-ehersisyo? Mahimo nimong inspirasyon ang pag-ehersisyo pinaagi sa pagpakita niini sa social media. Naa gani uban nga mag Facebook live while nagpasingot.
Busa, ayaw paghuna-huna nga ang social media ug exercise di magkauban. Namatud-an na nga mahimo ra ni. Imohang ipakita sa social media ang imong routine di aron pagpasigarbo, apan inspirasyon sa uban. Sama sa akong kauban nga si Flor Querubin.
Buntag o gabii
Dunay mga nangutana kon unsay maayo, mo-exercise sa buntag o ari na sa gabii? Kon ikaw sama nako dunay problema sa pagkatulog, mas maayo ang buntag sa pag-exercise. Mao usab ni ang mga resulta nga nakita sa mga pagtuon nga nagtandi sa epekto sa oras sa pag-exercise.
Ingon pa sa akong higalang doktor, kon insomniac ko ug ang adrenaline dali rang mosaka bisan sa pag kaon lang, di maayo nako ang pasingot sa gabii. Mao diay nga kaniadto, usahay alas 2 ngadto sa alas 3 na ko sa kaadlawon makatulog.
But dihang kada buntag na lang ko magpasingot, alas 11 pa lang sa gabii, hay-ad na ko sa higdaanan. Lami na kaayo ikatulog. Mag struggle na gani ko nga di makatug samtang nagpadung pagtapos sa mantalaan.
Di taas
Wa na kinahanglana nga molanat og usa ka oras ang exercise. Ang 30 minutos nga kada adlaw nga exercise dako na kaayo og ikatabang sa imong panglawas. Mao usab ni ang resulta sa pipila ka mga pagtuon.
Pila ra man nang tunga sa oras. Nganong di ka man makagahin? Aron mas lingaw, pagbukas sa imong Youtube, pangitag video sa zumba. Mag-zumba ka for 30 minutos. Di ka lang mahibawo, 30 minutos na diay ang imong nasayaw ug gipaningot ka pag maayo.
Busa, suwayi ang kada adlaw nga pasingot sud lang sa 30 minutos. Diha ka makakita sa kalainan kay seguradong sud sa pipila ka semanang pasingot, makakita ka sa resulta niini. Buhata.