PIPILA ka bulan sa tuig 1898-99, atong nalimtan nga nahimong gawasnon ang Sugbo sa mga Katsila ug wala pa makaabot ang pwersa sa Estados Unidos.
Didto sa kaulohan, padayon na ang gubat tali sa Pilipinas ug ang Estados Unidos kay wala man mosugot ang mga Katsila nga anha mosurender sa mga Pilipino. Didto sila mosurender sa mga Amerikano nga dunay itom nga plano sa pag-colonize sa Pilipinas.
Matod pa sa mga Amerikano, kinahanglang bansayon ang mga Pilipino sa pagdumala sa nasud. Mao nga armado nilang gigubat ug gipildi ang pwersa sa Pilipinas ubos ni Presidente Emilio Aguinaldo.
Apan dihang nibiya ang pwersa sa mga Katsila dinhi sa Sugbo pag Disyembre 24, 1898, wala pay mga Amerikano dinhi sa atua. Tua pa sila sa Luzon. Pipila pa ka bulan usa sila nianhi sa Sugbo.
Niadtong tungora sa Disyembre 24, nagkasabot ang pwersa sa Katipunan nga ubos nilang Hen. Luis Flores ug Hen. Arcadio Maxilom ug ang nahabiling mga Katsila nga malinawong mobiya ang naulahi. Ilang ipaubos ilang bandera dayon mosakay og barko padulong sa Zamboanga usa pa mopadayon balik sa Espanya.
Tungod niini, nidesisyon ang malampusong mga Katipunero nga mosulod sa Syudad sa Sugbo ngadto sa Cathedral alang sa usa ka misa pag Disyembre 29, 1898.
Tuod man, nagparada ang lain-laing pwersa sa mga nagmadaugong mga rebelde padulong sa Cathedral.
Ilang gisaulog ang Pasko sa Kadaugan.
Mao kini ang panahon nga walay langyaw nga nagdaogdaog kanato.
Tsina
Human sa mga tulo ka bulan, niabot ang mga Amerikano ug pila ray istorya nga nasakop gyud ang Sugbo sa nagkasakang Imperyalistang nasud nga Estados Unidos.
Karon, makaingon kita nga mga 120 ka tuig na ang Imperyalistang Kano.
Gikan sa direktang pagkontrola, nahimong neo-colony sa Amerika ang Pilipinas.
Human sa duha kalibotanong gubat ug usa ka Cold War, nagsud-ong kita karon sa posibilidad sa laing kalibotanong gubat.
Tungod kini karon sa pagsulbong sa Tsina isip usa ka malampusong ekonomiya ug pwersa militar.
Gusto sa Tsina karon nga makontrola ang dagat nga naa sa atubangan niini. Apan maigo ang mga kaalyado sa Amerika.
Ang nakadalag tigaw alang sa Amerika karon mao ang administrasyon ni Presidente Rodrigo Duterte.
Ang Pilipinas man unta ang lig-on nga alyado sa Estados Unidos. Ang si Pres. Duterte mas nakig-amigo sa Tsina kay sa Amerika.
Alang kanako, kining maong kahimtang dunay dakong epekto unta sa umaabot nga piliay karong 2020. (@anol_cebu sa Twitter)