MOKABAT sa P50,000 ngadto sa P70,000 matag buwan ang gilaraw nga madawat sa mga doktor nga job order sa Kapitolyo ubos sa Salary Grade 20 ug 22.
Kini maoy giklaro sa Kagamhanan sa Lalawigan sa Sugbo sukwahi sa unang taho nga moabot sa P22,000 ang suhulan sa mga doktor nga ipaubos isip JO.
Gipahibaw sa Provincial Health Office (PHO) nga moabot sa P58,707 ang madawat nga suhol sa usa ka medical specialist matag buwan samtang P52, 547 ang madawat matag buwan sa usa ka medical officer.
Sa kasamtangan, moabot sa 40 ka mga doktor ang gikinahanglan sa upat ka mga lungsod sa probinsya nga mao ang Dakbayan sa Danao, Balamban, Bogo ug Carcar.
Matag dapit nagkinahanglan og napulo ka mga doktor.
Sa pagkakaron, hapit na makompleto ang lista sa mga doktor sa lungsod sa Danao ug Balamban samtang upat pa lang ang mipakita og interes sa lungsod sa Carcar ug tulo usab sa Bogo. (ANV)