SUBLING mosalmot ang Dakbayan sa Talisay sa Sinulog 2020.
Ang Kagamhanan sa Dakbayan sa Talisay nigahin og dul-an sa P6 milyones alang sa pagsalmot.
Matod ni City budget officer Edgar Mabunay, nga susama ra usab kini sa nagasto sa miagi nga tuig nga pagsalmot.
Kini human mao usab ang giuyunan ni Talisay City Mayor Gerald Anthony Gullas Jr. isip suporta alang sa mga mo-participate sa kalihukan.
Gisiguro lang usab nila nga di mosubra sa kon pila ang nagasto sa miaging tuig.
Sunod Sabado himuon ang Sinulog sa Kabataan sa Lalawigan.Sa miaging tuig, sila ang nahimong grand champion.
Mao kadto ang ikaunom nga higayon sa Dakbayan sa Talisay nga nahimo silang grand champion.
Ang ilang tema sa Sinulog 2019 nga sayaw mao ang pagsentro sa pag-ampo alang sa kapahulayang dayon.
Pahinungod kadto alang sa ilang assistant choreopgrapher nga namatay sa 2018.
Ilang gigamit nga dakong backdrop ang lubnganan, lungon ug dagkong mga korona sa patay.
Nalangkat usab nila ang ikatulong dapit sa Sinulog-based category sa miaging tuig.
Matag tuig mosalmot ang Siyudad sa Talisay isip nahimo na usab nga panaad agig pasalamat ngadto kang Senior Sto. Niño.
Dugang ni Mabunay nga aduna man sab silay subsidy nga madawat gikan sa Sinulog Foundation isip usa sa mga contingent nga ilang magamit.
Alang ning tuiga nga pagsalmot, inisyal nga gibutyag ni Mabunay nga simple lang ang ilang tema nga mao ang kasagaran usab nga tema ang pagpakita sa ilang isog nga pangaliya sa Senior Sto. Niño.
Gikan sa usa ka ordinaryo nga mga deboto hangtud nga nakab-ot ang ilang mga kalampusan.
Apan aduna usab kini surpresa nga angay atngan sa mga manan-away.
Ning tuiga nga Sinulog, aduna silay 100 ka mga mananayaw ug propsmen nga langkuban gikan sa mga tinun-an sa Talisay City Central School. (FMD)