MOABOT sa P1.5 bilyones ang gitagana sa Department of Public Works and Highways (DPWH) 7 nga mga proyekto nga ipatuman sa Sugbo karong 2020.
Kasagaran niini mga convergence and special support program diin partner sa DPWH ang ubang mga ahensiya sa pagpatuman.
Karong 2020, adunay P316 milyones ang budget sa DPWH 7 alang sa by-pass ug diversion roads sa Metro Cebu Expressway alang sa sidewalk, bikelane, curb and gutter, lined canal, ug slope protector.
Nagkadaiyang police stations usab ang tukoron sa DPWH 7 sa unom ka mga lungsod sa Sugbo. Naglakip niini ang Medellin, Tabuelan, San Fernando, Balamban, Borbon, ug Pilar sa isla sa Camotes diin aduna’y gitagana nga P60 milyones sa mga police station, o P10 kada usa.
Ang maong mga police station nalakip kini sa Convergence and Special Support Program sa DPWH ug Department of Interior and Local Government (DILG).
CSSP usab sa DPWH ug Department of Tourism (DOT) kining proyekto nga pagpalambo sa mga access road sama sa Pilipog-Gabi Coastal Road paingon sa Gilutongan Marine Sanctuary, Nalusuan Marine Sanctuary sa Brgy. Pilipog, Cordova nga aduna’y P111 milyones nga budget.
Ang P135 milyones nga access road sa Aloguinsan-Boho-Catabogon paingon sa Hermit’s Cove; Malabago-Kalangkang-Sanlagan-Candiis-Sulsogon Road paingon sa Kawasan Falls nga nagkatidad og P131; ug ang Santa Fe-Madridejos access roads nga nagkantidad og P150 milyones.
Nitagana usab ang DPWH 7 og P14 milyones isip pagkompleto sa Department of Justice building nga anaa mahimutang sa M. Velez, Guadalupe, Cebu City ug preventive maintenance sa South Coastal Road nga P132 milyones.
Samtang bag-ong mga dalan gikan sa Alcoy-Alegria ug pabalik nga aduna’y P150 milyones nga budget.
Diversion roads sa Barili-Aloguinsan nga P150 milyon ug ang road widening sa N. Bacalso Cebu South Road sa Cebu Province nga aduna’y gitagana nga P150 milyones.
Matod ni Engr. Boy Sayson, sa Construction Division sa DPWH 7 nga karon nga cash-based budgeting system na ang DPWH, kinahanglan nila nga mahuman ang mga proyekto karong tuiga. (HBL)