HAPIT modoble ang gidaghanon sa sunog nga natala niadtong 2019 itandi sa mga kaso sa sunog sa 2018 lukop Central Visayas.
Kini base na usab sa datus sa Bureau of Fire Protection (BFP) 7 human niabot sa 1,893 ka mga insidente sa sunog ang natala sa 2019, itandi sa 1,005 sa 2018.
Apan kon basehan ang danyos, mas dako gihapon ang 2018 tungod kay niabot og P1.1 bilyones samtang anaa lang sa P250 milyones ang natala sa 2019.
Base sa lima ka mga fire district sa Central Visayas, nag-una gihapon ang Cebu Province lakip ang Cebu City nga adunay labing daghang mga kaso sa sunog nga anaa sa 1,311 ka mga insidente sa 2019 itandi sa 550 ka insidente niadtong 2018.
Gisundan kini sa Negros Oriental nga adunay 335 ka mga insidente sa sunog sa 2019 itandi sa 159 sa 2018.
Sunod niini mao ang Bohol Province nga adunay 177 ka mga insidente sa 2019 itandi sa 232 sa 2018.
Ikaupat ang Lapu-Lapu City Fire District nga anaa’y 50 ka sa sunog sa 2019 itandi sa 29 ka insidente sa 2018.
Uwahi ang Siquijor sa 20 ka insidente sa 2019 itandi sa 35 ka insidente sa 2018.
Sa mga kaso sa 2019, natala sa Abril ang labing daghang insidente sa sunog diin niabot og 336 ka insidente.
Samtang sa 2018, ang Agusto ang aduna’y labing daghang sunog nga natala nga niabot og 160 lukop rehiyon.
Kon itandi ang mga gibana-bana nga danyos sa sunog sa duha ka tuig, mas taas gihapon ang 2018, rason niini kadtong sunog sa Metro Ayala, Enero sa maong tuig.
Sa 2019, anaa sa P74 milyones ang danyos sa sunog sa Sugbo itandi sa P1.06 bilyones sa 2018.
Gisundan kini sa Negros Oriental nga aduna’y danyos nga P174 milyones sa 2019 itandi sa P34 milyones sa 2018.
Ikatulo mao ang Bohol diin anaa sa P21 milyones ang danyos sa 2019 itandi sa P31 milyones sa 2018.
Samtang ikaupat sa Lapu-Lapu City Fire District sa danyos nga P6.3 milyones sa 2019 itandi sa P3.8 milyones sa 2018.
Uwahi ang Siquijor sa P958,000 nga danyos sa 2019 itandi sa P1.8 milyones sa 2018.