NADAKPAN ang gitumbok nga tag-iya sa duha ka kilong shabu kay gipiyait sa iyang uyoan nga maoy unang nadakpan.
Nadakpan kini kay gitudlo ni Nicanor Cabornay, barangay employee sa Barangay Tisa, Siyudad sa Sugbo, kinsa nakuhaan sa duha ka kilo nga shabu sa buy-bust operation niadtong Huwebes sa gabii.
Si Police Capt. Janelito Marquez, hepe sa Guadalupe Police Station, kuyog sa iyang mga operatiba sa Drug Enforcement Unit, nihimo og follow-up operation sa gitudlo nga tag-iya sa duha ka kilo nga shabu ug miresulta sa pagkadakop niini.
Si Jeffrey Paloma, alyas Opong, 24 ug kapuyo niini nga si Irene Cabornay, 19, pulos mga lumolupyo sa Sityo Capaculan, Barangay Tisa ning siyudad, nadakpan sa Good Shepherd sa Banawa.
Nasikop og apil si Rodel Panuncialman, 19,silingan nila ni Paloma ug Cabornay, kinsa nasakmitan gihapon og shabu.
Matod ni Marquez nga duha ka mga dakop ang ilang gihimo.
Unang nadakpan ang managkapuyo nga Paloma ug Cabornay ug mga kapin sa oras ang nakalabay, si Panuncialman na usab ang nadakpan.
Dugang ni Marquez nga dihang nadakpan si Paloma ug Cabornay, nitug-an kini nga duna pay lain nga shabu nga nabilin si Paloma nga tua kang Panuncialman ug maoy gikasabot sa nagpailang pusuer buyer. Wa makahibawo si Panuncialman nga mga pulis na diay ang iyang kasabot.
Sa duha ka mga operation, 100 gramos ang nasakmit sa duha ka buy-bust operation nga mobalor sa og P680,000 base sa Dangerous Drugs Board (DDB) value.
Si Opong nanghimakak nga iya ang duha ka kilong shabu nga nakuiha gikan sa iyang uyoan. Samtang sa lain nga mga buy bust operation, nadakpan si Phrixus Flordelis, 25, taga Barangay Carreta, Siyudad sa Sugbo sa mga sakop sa Waterfront Police.
Siya nasakmitan og shabu balor og P25,000. Nasikop usab si Amelita Tudtud, 38, taga Silangan 1, Barangay Tinago, Siyudad sa Sugbo sa Drug Enforcement Unit sa Cebu City Police Office sa pagpangulo ni Police Lt. Col. Frankie Lugo. (BBT)