NAILHAN na sa kapulisan sa lungsod sa Consolacion, Sugbo, ang suspek sa pagpatay sa duha ka mga magsuon niadtong Enero 1, 2020 sa gabii.
Ang kaso giingong road rage kay naglalis ang suspek ug mga biktima labot sa trapiko.
Pinaagi sa Facebook page sa Consolacion Police Station, nangayo sila og abag sa publiko aron masikop ang suspek nga giilang si Danny Desierto, alyas Inad, taga Barangay Tugbongan sa mao nga lungsod.
Si Desierto nailhan pinaagi sa abag sa mga saksi, kinsa nanghangyo sa kapulisan nga di nganlan. Si Desierto mao ang gitumbok nga gikaaway sa magsuong Rogelio, 53, ug Marcel Garcia, 50, sa may Barangay Poblacion, Consolacion.
Unang gikaaway ni Desierto si Marcel, apan niuwang si Rogelio. Sila na hinuon ni Rogelio ug suspek ang nagkaaway. Niibot og pusil si Desierto ug gipamusil ang magsuon.
Namatay diha-diha si Rogelio samtang si Marcel nakabsan sa kinabuhi sa mga alas 4 sa kaadlawon sa Enero 2 sud sa usa ka pribadong tambalanan.
Matod pa ni Police Executive Master Sgt. Vincent Aguanta, deputy chief of police sa Consolacion nga nahinabi sa Superbalita Cebu, nga subay sa imbestigasyon, dunay mipatim-aw nga saksi.
Naglaum sila nga moirog ang kaso sa pagpatay sa duha ka mga magsuon tungod niini.
“Ang kanang suspek nailhan na siya tungod usab sa pagtabang sa atong mga intel operatives nga maoy mitabang sa pagtugma sa pagkatawo sa atong gitudlo nga suspek,” matud ni Aguanta.
Nagtuo si Aguanta nga pinaagi sa pag post sa social media, dako og ikatabang ang publiko ug dali matumbok kon asa nagtago-tago si Desierto. Wa mobutyag si Aguanta sa background sa suspek, kinsa gituohang wa pa makagawas sa Sugbo.
Kon kinsay dunay kasayuran ug makatudlo o makakita sa suspek, mamahimo nga itawag lang sa mga numero 0998-5986391 sa Smart number ug sa ilang globe number 0967-3519602 o diba kaha sa ilang landline number 423-7028.