MALALAG, Davao del Sur -- Sa ikaduhang higayon, wa makasipot si Presidente Rodrigo Duterte sa ceremonial turnover alang sa pagtunol sa tabang pinansiyal ngadto sa mga biktima sa linog sa Padada ug mga kasikbit niini nga lungsod, Biyernes sa hapon, Enero 3.
Sila Senador Christopher Lawrence “Bong” Go ug Presidential son ug Davao City Vice Mayor Sebastian Duterte maoy nag-representa sa pamuno nasud nga niabot banda alas 50 sa hapon.
Kauban sa batan-ong Duterte ug Go si Department of Social Welfare and Development Undersecretary Luz Ilagan nga mitunol sa tseke kantidad P5 milyon gikan sa Office of the President ngadto kang Malalag Mayor Peter Paul Valtan.
Gawas sa cash assistance, ang presidential son maoy nanguna sa ceremonial rites dihang gitunol ang mga food packs alang sa lima ka pamilyang biktima sa linog.
Sa pagpamulong ni Go, nangayo kini og dispensa nga wa makatambong ang Presidente sanglit “not feeling well” kini sukad Enero 2 ug giabisohan sa iyang doktor nga mopahulay una.
Apan giklaro ni Go atubangan sa 1,500 indibiduwal nga mitambong sa programa nga “okay” ang kondisyon sa panglawas sa 74-anyos nga pamuno nasud.
Dugang pa ni Go, gitakdang molarga sa kaulohang Manila si Duterte aron motambong sa turnover ceremonies alang sa bag-ong chief of staff sa Armed Forces of the Philippines sa Sabado, Enero 4.
Kapin tulo ka oras nga naghuwat ang mga biktima sa linog human unang nakansela ang pagbisita ni Duterte niadtong Huwebes, Enero 2, kay dili maayo ang gipamati sa lawas.
Sa Padada, gidawat sab ni Mayor Pedro Caminero ang tseke nga P5 milyon didto sa Padada Central Elementary School.
Matud sa bakwit nga si Felisa, 52, iya gyud gihuwat ang pag-abot sa presidente aron makita nga personal apan pakyas kini.
Hinuon, nalipay siya dihang nakit-an si Sebastian nga personal sanglit sa telebisyon lang niya sagad makit-an.
Ang maong aktibidad hayan ang una nga eskedyul ni Duterte niining 2020.
Kahinumdoman nga ang magnitude 6.9 nga linog niadtong Disyembre 15, 2019 mihatag og dakong damyos sa mga kabalayan, gambalay, kalsada ug uban pang imprastraktura sa probinsiya.