DAVAO DEL SUR -- Gianunsyo na sa Department of Education (DepEd) sa Davao Region ang pormal nga pagbalik sa klase, karong adlawa human ang Christmas vacation.
Matud sa DepEd-Davao nga tanang pampublikong tunghaan gikan elementarya padung sa sekondarya ang dungang mobalik sa klase karong adlawa, Lunes, Enero 6, 2020.
Gitakda sab sa DepEd ang Third Quarter Examinations karong Enero 9 ug 10 o duha ka adlaw human nagsugod ang klase.
Sa official calendar sa DepEd 2019-2020, alang sa publiko ug pribadong tunghaan lukop nasud, gawas sa mga special nga adlaw sa mga pribadong tunghaan, mahitabo ang deworming sa mga tinun-an hangtud sa Enero 31.
Sa Enero 18, ang distribusyon sa mga school cards ug PTA conference.
Regular holiday ang Enero 25, sanglit Chinese New Year kini apan natunong sa adlaw’ng Sabado.
Gihimo sab nga regular holiday ang Pebrero 25 kun Edsa People Power Anniversary nga adlaw’ng Martes.
Sa Marso 12-13 mao ang Fourth Quarter Examination alang sa Grades 6 ug 12 ug Marso 19-20 alang sa Grades 1-5 ug 7-11.
Sa Marso 30 ngadto Abril 3 magsugod na ang mga Graduation ug Moving-up ceremonies.
Samtang, sa Abril 3 mao ang katapusang adlaw sa klase ug sa Mayo 22 mao ang katapusang adlaw sa summer classes.
Apan, wa masayri kun aduna’y madelatar nga klase sa Davao del Sur human nadugangan ang damyos sa linog niadtong Disyembre 15.
Hinuon, nakatukod na og mga makeshift classrooms ang ubang mga tunghaan diin balik normal na sab ang ilang klase.