BANSALAN, Davao del Sur - Iyahay og paningkamot ang mga pasahero nga makauli na sa ilang destinasyon human ang taas nga bakasyon sa Pasko ug Bag-ong Tuig.
Sanglit puno ng daan ang mga de-pasaherong bus gikan sa probinsya sa North Cotabato.
Nunot niini, naningkamot ang pasaherong si Elsa Arellano, 28, nga makasakay padung sa dakbayan sa Davao kagahapon sa buntag.
Mobalik na kini sa iyang trabaho sa usa ka pribadong kompaniya sa siyudad.
Di sab mahimong mo-absent si Roger Villarde, 23, sa iyang trabaho isip call center agent mao nga naningkamot sab kining makasakay gikan sa dakbayan sa Digos padung sa General Santos City.
Matud sa konduktor nga si Rico, sukad adlaw’ng Byernes, wa na’y puas ang pagdagsa sa mga pasahero sa mga nagkadaiyang terminal gikan sa pa siyudad sa Kidapawan.
Apan, bisan nagdasok ang mga pasahero, nagpabiling hapsay ug malinawon ang mga pampublikong terminal sa lalawigan.
Aduna sab mga pulis nga nagbantay sukad pa niadtong pagsugod sa holiday season aron masiguro nga luwas ang ilang seguridad.
Gipasidan-an sab sa kapulisan ang mga drayber nga di magkaskasero ug likayan ang overloading aron luwas sa byahe.
Usa ka yunit sa Mindanao Star Bus ang nahug sa pangpang didto sa Brgy. Amas sa Kidapawan City nga gikaangol sa 26 ka pasahero niadtong Biyernes.
Nanaghap ang ubang pasahero nga nakatug ang drayber niini hinungdan nga wa na mosubay sa dalan ang maong bus.