COTABATO CITY -- Personal nga atraso ang gilantaw nga motibo sa awtoridad sa pagpamusil-patay sa usa ka miyembro sa Barangay Lupon alas 8:40 sa buntag niadtong adlaw nga Sabado sa probinsiya sa Maguindanao.
Giila ang biktima nga si Guianor Pasawilan Samama, 40 anyos, minyo, ug Barangay Lupon sa Barangay Upper Capiton Datu Odin Sinsuat, Maguindanao.
Sa taho gikan sa Datu Odin Sinsuat MPS nga samtang sakay ang biktima sa iyang gimaneho nga payong-payong sa Sitio Curbada, Barangay Upper, Capiton DOS kalit lang siyang gitaparan sa duha ka tawo nga nag-motor ug gipusil gamit ang kalibre .45 nga pistola.
Abtik sab nga miikyas ang mga namusil paingon sa hilit nga dapit sa Datu Odin Sinsuat sa Maguindanao.
Gisapupo si Samama sa mga nagrespondeng pulis ug gidala sa Cotabato Regional and Medical Center (CRMC) sa siyudad sa Cotabato apan gideklara siya sa mga doktor nga dead on arrival.
Naka-angkon og upat ka samad pinusilan sa nagkadaiyang parte sa iyang kalawasan ang Lupon nga maoy hinungdan sa iyang kamatayon.
Adunay gidudahan nga mga tawo ang mga paryente sa biktima nga maoy mipatay niini nga ilang kaaway sa pamilya o ka-rido.
Sa kasamtangan, ang kapulisan sa Datu Odin Sinsuat Maguindanao ang padayon nga nag-imbestiga sa pagpamusil-patay sa biktima.