Department of OFW giduso sa magbabalaud sa NorCot

KIDAPAWAN CITY -- Giduso ni Cotabato 2nd District Representative Rudy Caoagdan og usa ka departamento alang sa mga overseas Filipino workers (OFWs) diin tawgon na unya kining Department of OFW.

Anaa na sa first reading sa Kongreso og posibleng mahimong balaudnon ang Department of OFW karong bulan sa Enero.

Dakong tabang na unya kini sa mga OFW nga taga North Cotabato ug sa tanang OFW sa nasud gumikan aduna nay buhatan nga tukuron ang maong ahensya sa Kidapawan City.

Duol na kaayo kini sa mga OFW nga taga North Cotabato, Maguindanao ug Cotabato City diin dili na sila muadto pa sa Cagayan de Oro City o General Santos City aron lang magproseso sa ilang mga dokumento.

Maghatag usab kini og paagi aron matabangan ang mga nanginahanglan nga mga overseas workers ilabi na kadtong adunay grabe nga mga problema sa gawas sa nasud susama sa nahitabo kang Jeanelyn Villavende.

Pabor sab si Caoagdan nga mugnaon ang Department of Disaster Resilience ilabi na nga grabeng giigo sa linog ang ikaduhang distrito sa probinsiya sa Cotabato.

Ang DDR maoy mahimong lead agency sa disaster risk reduction, disaster preparedness and response, rehabilitation and recovery.

Mao sab kini ang taas nga panglantaw sa National Disaster Risk Reduction and Management Council o NDRRMC.

Kahinumdoman nga usa kini sa gipursige ni Senate Majority Leader Juan Miguel Zubiri sa iyang pagbisita sa mga dapit sa North Cotabato nga grabeng giigo sa sunod-sunod nga linog.