DAVAO DEL NORTE -- Ospital ang gipadulngan sa 67-anyos nga lolo nga giluba sa 17-anyos nga ulitawo nga gibadlong niini didto sa Purok 6, Barangay Ising, Carmen alas 12:50 sa kadlawon, niadtong Enero 4.
Ang biktima giila nga si Ramon Maloloy-on Nuyad, 67-anyos, minyo ug molupyo sa nahisgutang dapit.
Base sa report, ang biktima giluba sa suspek nga si alyas Rec-Rec, usa ka out-of-school youth ug molupyo sa susamang dapit.
Base sa inisyal nga imbestigasyon sa kapulisan, nga samtang natulog ang biktima sulod sa balay niini, miabot ang suspek nga lango sa ilimnong makahubog ug nakig-istorya sa iyang mga higala.
Matud pa nga gibadlong sila sa biktima nga di magsaba ug hinayan ang tingog kay lawom na ang kagabhion, apan ang suspek nasuko hangtod nga nagkalalis sila sa biktima ug miabot sa punto nga gihapak og botelya sa suspek ang ulo sa biktima.
Sa kalagot sa suspek, mihulbot kini og kutsilyo ug giluba ang biktima.
Naka-angkon ang biktima og samad dinunggaban sa tuong bukton.
Human sa insidente, ang suspek daling mipalayo padung sa wala masayring direksyon, samtang ang biktima gidala sa Carmen District Hospital aron nga matambalan.
Apan, wa madugay gibalhin pagdala sa Davao Regional Medical Center sa siyudad sa Tagum alang sa dugang medikasyon.