DAVAO DE ORO -- Gihatod na sa hingpit nga kapahulayan alas 2:00 sa hapon, Enero 4, 2020 didto sa sam-ang sa lungsod sa New Bataan, Davao de Oro ang lalaki nga namatay human giingong nagsuka og agukoy’ng buhi.
Matud pa nga ang namatay nga gitago sa pangalang alyas Macky, 22-anyos, nagtrabaho isip empleyado sa lokal nga kagamhanan sa siyudad sa Cotabato ug lumad nga taga Barangay Cogonon lungsod sa Compostela.
Gibutyag sa pedicab driver nga si Ruben, kinsa silingan sa biktima ug usa sa mga mihatod sa paglubong sa patay nga ang maong namatay gipatambalan sa ospital apan wa’y nakitang hinungdan sa balatian ang mga doktor nga mihiling niini.
Giingon nga miburot ang tiyan sa biktima ug nagsuka kini og mga agukoy o mga puyo sa dagat nga buhing miguwa gikan sa baba niini ug gawas sa maong mga agukoy aduna pa’y daghang mga balas sa dagat nga lakip nga gisuka niini hangtod nga nabugtuan sa gininhawa niadtong Disyembre 19, 2019 didto sa siyudad sa Cotabato.
Ang inahan sa biktima, suma pa ni Ruben, nibutyag nga ang iyang anak adunay karelasyon nga kauban sa trabaho nga dili susama kanila og relihiyon apan ang maong karelasyon sa biktima gibiyaan niini ug nakig-ipon sa laing babaye nga susama kaniya nga Katoliko.
Ang patay’ng lawas sa biktima gibiyahi pauli ngadto sa pamilya niini sa Barangay Cogonon, Compostela ug sa yutang natawhan didto gipahiluna sa hingpit.