KARONG adlawa na moarangkada ang usa ka semana nga selebrasyon ug kalihokan sa Kuyamis Festival.
Ang kapitolyo probinsyal sa pagpanguna ni Misamis Oriental Governor Bambi Emano ug ang departamento nga maoy naghany-ay sa kalihokan niini nga mao ang Department of Tourism sa pagpanguna ni Atty. Jeffrey Saclot ang mihan-ay na og nagkadaiyang kalihokan ug programa karong semanaha nga siguradong molingaw sa mga Misamisnon.
Karong adlawa ang opening ceremony kon asa mamatikdan na ang katukoran sa mga Kuyamis Booth nga gilakipan sa nagkadaiyang lungsod sa lalawigan.
P1 milyon ang dawaton sa mananaog sa booth competition ug gitakdang street dancing competition kon asa dili cash apan kantidad sa usa ka proyekto nga maharbat sa munisipyo nga misalmot sa kompetisyon.
Highlights sab sa kalihokan ang kalihokan mao kining pagpili sa Miss Kuyamis 2020 kay sagad sa mananaog niini ipangbato ngadto sa national nga kompetisyon ug tulo na ka tuig ang nilabay nga layo na og naabtan ang mga kandidata human miharbat ug mga tag-as nga titulo panahon sa mga kompetisyon.
Usa sab sa angayan hulatan karon nga tuig mao kining Mindanao Overland Expedition kung diin dili mominos gatusan ka mga sakyanan ang magkompete gikan sa bukid sa Opol ngadto bukid sa Manticao.
Sa Enero 6 nga mao ang adlaw sa pagbukas sa kalihokan mao ang pagsugod sa farmer's market, bazaar ug cafe ug first judging sa Kuyamis Booth competition; sugdan sab ang Kuyamis Sportsfest; pagbukas sa Cultural arts exhibit; Inagurasyon sa Kiddie pool sa Lourdes sa Binuangan ug Kuyamis Festival Night sa lungsod sa Sugbongcogon.
Pagka petsa 7 sa Enero aduna pagahimoun nga dakong Kuyamis Job Fair karong petsa 7 diha sa hawanan sa kapitolyo, Indigenous People Skills Competition, lakip niini ang Festival Night sa lungsod sa Naawan pagkagabii.
Sa Enero 8 mao ang nagpadayon nga display sa mga booth, farmers market, bazaar ug uban pa ug kining adlawa himoun pagka alas 2:00 sa hapon ang Street Dancing Competition nga ipahigayon sa Pelaez Sports Center.
Sa Enero 9 mao ang Coronation night sa Miss Kuyamis 2020 sa El Salvador City.
Sa Enero 10 mao ang 2nd Gov. Bambi Emano Horse show competition; Dog Fashion show ug final judging sa booth competition ug kickoff sa Mindanao Overland Expedition.
Sa Enero 11 mao ang padayon nga kalihokan sa mga gisugdan sa Enero 10 ug dinhi sugdan ang Autocross Car show; closing program sa Culture and the Arts ug ang pagpili sa Queen of MisOr atol sa pagtapos sa gabii sa Governor's Night lakip awarding ceremony.
“We assure you the 7th Kuyamis Festival this year’s edition is much going to be brighter much bigger more festive than ever,” mapasigarbuhong sulti ni Saclot.