MIREPORT sa kapulisan ang turista human gikawatan sa wala mailang suspetsado samtang nag-camping gamit ang tent gawas nga bahin sa Alomas Farm sa Dahilayan, lungsod sa Manolo Fortich, Bukidnon.
Nadiskubre ang insidente mga alas 4:00 sa kadlawon, Enero 3.
Mireport sa kapolisan si Rizalino Simbre, 40, minyo, taga Carmen ning siyudad sa Cagayan de Oro ug gipahibalo ang nahitabo sa ilang pamilya.
Nasayran gikan sa Manolo Fortich Police Station nga tibouk pamilyang nagsuroy sa Alomas Farm ug nag-install og tents niadtong Huwebes pa sa buntag ug didto na nangatulog.
Maoy ilang nadiskubre nga nagisi na ilang tent sa kilid nga bahin ug nakuha ang bag nga adunay sulod P50,000.
Lakip sa nalimas ang S10 nga cellphone balor sab og P50K, IDS, laing cellphone nga tag P12K ug uban pang importanteng dokumento.
Sa pagkakaron gitumbok pa ang responsable sa pagpangawat.