NAPUGNGAN man tuod sa San Antonio Spurs sa 1st half ang labing pambato sa hosts Milwaukee Bucks nga si Giannis Antetokounmpo apan wala kini molungtad.
Ang kasamtangang MVP kalit lang nagmangtas sa 3rd quarter aron agakon ang Bucks sa 127-118 nga kadaugan kagahapon sa National Basketball Association (NBA).
Gimugna ni Antetokounmpo sa 3rd quarter ang 19 sa iyang kinatibuk-ang 32 puntos nga nakatuboy sa Bucks ngadto sa 32-5 nga rekord ug nagpahugot sa ilang paggunit sa liderato sa overall standing.
Kanunay gi-foul sa Spurs si Antetokounmpo sa 2nd half aron mapugos kini pagmugna sa iyang mga puntos sa freethrow line diin 60% ra ang iyang napasulod ning maong season.
Apan ning higayuna, wala nasipyat si Antetokounmpo sa iyang 12 ka freethrow attempts sa 2nd half lakip na niini ang 10 sa 3rd quarter nga nakatabang sa pagsutoy sa opensa sa Bucks.
“That’s how Giannis is built,” asoy ni Bucks coach Mike Budenholzer. “It felt like they were going to foul him every time he drove it and test him at the free throw line. If they’re going to put him on the free throw line, I think Giannis will make them pay for it.”
Nagkanayon si Antetokounmpo nga nakasabot siya sa gihimong depensa sa Spurs ngadto kaniya apan iyang giklaro nga wala siya nagpaapekto niini ug nagtutok lang gihapon siya’g insakto sa duwa.
“I’m going to trust my technique,” asoy ni Antetokounmpo, kinsa igo lang nakamugna og siyam ka mga puntos sa 1st half. “I saw that whenever I was getting in the paint, they tried to reach and foul and push me and all that. I said, ‘OK, tonight is going to be the night.’ I tried to drive it, go in the paint and just make a play for myself or for my teammate.”
Ang Bucks ningrehistro sa ilang ikalimang sunodsunod nga kadaugan gikan niadtong adlaw sa Pasko diin gilupig sila sa Philadelphia 76ers.
Si Eric Bledsoe nidugang og 21 puntos alang sa Bucks samtang niamot og 20 puntos si Khris Middleton.
“I thought we did a really good job in the first half, but he (Antetokounmpo) got away from us,” batbat ni Spurs coach Gregg Popovich. “It’s a hell of a team. Those brothers killed us with the blocks and we were fouling too much.”
Ang Spurs, nga natagak sa 14-20 nga rekord, gipangulohan ni DeMar DeRozan pinaagi sa iyang 26 puntos, nitunol og 16 puntos si LaMarcus Aldrdige samtang nihatag og 15 puntos si Rudy Gay.
Sa laing mga duwa, ningdaog ang Memphis Grizzlies batok Los Angeles Clippers, 140-114; Toronto Raptors batok Brooklyn Nets, 121-102; Boston Celtics batok Chicago Bulls, 111-104; Charlotte Hornets batok Dallas Mavericks, 123-120 OT; Washington Wizards batok Denver Nuggets, 129-114; Utah Jazz batok Orlando Magic, 109, 96, Oklahoma City Thunder batok Cleveland Cavaliers, 121-106; Detriot Pistons batok Golden State Warriors, 111-104; Atlanta Hawks batok Indiana Pacers, 116-111; ug New Orleans Pelicans batok Sacramento Kings, 117-115. (AP, ESL)