UPAT ka mga tawo ang nasikop sa tulo ka managlahi nga operasyon sa Oplan Limpyo Talisay niadtong Sabado, Enero 4, ug Dominggo, Enero 5.
Duha nasikop sa anti-drug operation, anti-gambling ug nangasakmit ang gatusan ka mga butane diha sa ilang nasutang ilegal nga refelling station sa mga butane.
Unang nasikop ang duha ka giila nga newly identified drug players sa drugas nga sila Maryjel Omblero Lacap, 43, construction worker, taga sitio Crusher, Barangay Lawaan 3. Lakip sa nasikop ang iyang silingan nga si Luis Rekentosa Secretaria, 30.
Nasikop sila sa Sitio San Rafael, Barangay Tanke. Nasakmitan sila og 24 ka mga pinakete sa gidudahan nga shabu nga gibana-bana mobalor og dul-an sa P5 mil.
Pipila ka oras human sa buy bust gipahigayon usab ang operasyon batok sa usa ka gitumbok nga illegal refilling station sa mga butane canister sa sitio Litmon, Barangay Poblacion.
Matod ni Police Major Gerard Ace Pelare, hepe sa Talisay City Police Station, nga mga report gikan sa nagpakabana nga mga Talisaynon ang nakatabang kanila.
Nasakmit ang tulo ka mga dagko tag 50 kilos nga liquified petroleum gas tank, 112 ka mga ka puno na nga butane canister ug unom ka refiller apparatus.
Lakip sa nasakmit ang P2,400 nga kwarta nga gituohan nga halin.
Laing duha usab ka mga lalake ang nasikop human nasakpan nga nangduwa og video karera ug moli-moli machine sa Sitio Burlas, Barangay Lagtang.
Ang nasikop mao sila si Dave Gonzales Zabate, 32, ug Rickline Ulgasan, 34. (FMD)