NO JAYWALKING nga polisiya ang estrikto na unya nga ipatuman sa kagamhanan sa dakbayan sa Talisay sugod karong buwana o sa sunod buwan.
Gitug-an ni Jonathan Tumulak, pangulo sa City of Talisay Traffic Operations Development Authority (CT-Toda), nga padayon ang ilang pagpalambo kalabot sa pag-manage sa trapiko sa siyudad aron mahatagan gyud og solusyon ang problema sa trapiko.
Ning 2020, usa sa ilang nakita nga anaa sa mga ordinansa sa trapiko sa siyudad nga wala lang estrikto napatuman ang ‘No Jay walking’ kon ang paglabang sa mga tawo diha sa dan nga dili pedestrian lane.
“Amo gitan-aw karon sa mga ordinansa kon unsa pa ning anaa na but wala lang ma-apply. Usa ana ang No jay walking. We will penalize those who will violate,” saysay ni Tumulak.
Matod ni Tumulak, ilang nakita nga gawas nga risgo sa mga tawo ang molabang diha sa dili pedestrian lane ug nakig-ilog sa mga sakyanan, risgo usab sa mga motorista.
Dugang ni Tumulak nga usa usab kini ang nakita nila nga hinungdan sa paghuot sa trapiko.
Estrikto unya kini nga ipatuman una diha sa mga barangay Bulacao ug Tabunok nga area.
Susihon pa lang nila pagbalik, kon pila ang multa niini ug uban pang sanction sa mag jay walking.
Sa di pa kini hingpit nga mapatuman, nipasalig si Tumulak nga mohatag sila og igo nga panahon pagpahibawo sa Talisaynon ug sa uban pa nga motuyo sa Talisay.
Ug nakig-alayon usab una sila sa konseho ug sa buhatan ni Talisay City Mayor Gerald Anthony Gullas alang sa hingpit ug estrikyo nga pagpatuman sa maong dugang balaud diha sa dan sa dakbayan.
Matod ni Tumulak, usa lang kini sa daghan pa nga ilang ipatuman ning tuiga, gawas sa dugang pa unya nga mga personnel sa CT-TODA. (FMD)