NAKIGSABOT si Mandaue City Mayor Jonas Cortes sa duha ka pribadong mga ospital sa dakbayan sa Mandaue, Chong Hua Hospital ug University of Cebu-Medical Center, nga mohatag og discounted o libreng serbisyo ngadto sa mga Mandauehanon isip corporate social responsibility program (CSR).
Nahisgotan na kini ni Cortes ang maong plano nga pakigsabot sa iyang State of the City Address (Soca) niadtong Oktubre 2019 bahin sa dako og matabang sa mga Mandauehanon labi na sa mga pobre kon discounted o libre na ang serbisyo isip CSR program sa duha ka ospital kaysa mga medical mission sa kada barangay.
“Nakig-tie-up ta sa Chong Hua ug UCMed kay ato sila gi-encourage nga mag-come up og agreement nga maghatag og charity services sa mga less fortunate Mandauehanons nya ang CSR ...Amo sila gihangyo nga maka-provide gyud sila og recess at least Mandauehanon maka-avail sad og mga serbisyo sa mga espesyalista sa Chong Hua ug sa UCMed,” sigon ni Cortes.
Unahon sa pag-atiman ang mga taga Mandaue labi na ang mga pobre kon modangop sa maong mga serbisyo.
“I-identify lang nga kon taga Mandaue sila with the proper documentation and certification with the barangay or city level unya taga Mandaue sila so maka-avail sila,” sigon ni Cortes.
Anaay pipila ka mga serbisyo ang hatagan og libre o discounted nga serbisyo apan sa pagkakaron sigon ni Atty. John Eddu Ybañez, chief of staff sa dakbayan sa Mandaue, miingon nga duha pa ka departamento ang nikompirmar nga lakip sa mga discounted o libre nga sebisyo nga ihalad mao ang Orthopedics and Ob-gyne.
Sigon ni Cortes nga kasamtangang gi-draft pa konseho sa dakbayan ug sa Committee on Health nga gipangulohan ni Nerissa Soon-Ruiz, ang memorandum of agreement (MOA) sa maong kasabotan.
Sigon ni Cortes nga uyon ra ug nikooperar ra ang duha ka ospital sa hangyo nga hatagan og discount o libreng serbisyo ang mga Mandauehanon.
“Once nga ma-approve na sa council ang agreement and once nga ma-ratified, that’s the time that we implement,” dugang ni Cortes. (KFD)