DUHA ang kritikal ug dili mominos 40 ka mga balay ang naugdaw human sa sunog sa Barangay T. Padilla, siyudad sa Sugbo, niadtong Sabado sa gabii, Enero 4.
Atol ning pagsuwat, kritikal pa sud sa ospital sila si Maria Villeñia, 80, nag-antos sa 2nd ug 3rd degree burn sa taas nga bahin sa lawas ug Rene Abellana, 39, nakaangkon og second degree burn upper extremity.
Ang 2nd second degree burn naglakip sa duha ka layers sa panit nga epidermis ug dermis. Ang 3rd degree grabe nga hapit na moabot sa bukog ang sunog.
Si FO2 Fulbert Navarro, fire investigator, nibutyag nga nagsugod ang kayo sa panimalay nga gipanag-iya sa pamilyang Avila nga gihimong paabangan nga kwarto.
Dugang ni Navarro nga nadawat ang alarma sa sunog alas 9:54 sa gabii ug kasagaran mga nagpuyo padung na mangatulog.
Upat ka minuto ang milabay gisaka ang second alarm, mga fire truck sa amihanang bahin sa Sugbo gipanawagan na sa pagresponde ug giisa na usab sa ikatulong alarma sa alas 10:11 sa gabii.
Giangkon ni Navarro nga lisod sa pagpunterya sa nagpadayon sa paglamoy sa maong kayo sa kabalayan tungod kay sudlunon ang maong lugar hinungdan nga gipangsumpaysumpay ang mga hose aron makapadagan og tubig paingon sa nasunog nga mga balay.
Tungod usab sa kakusog sa hangin nga natagamtaman sa mga bombero gipaniguro nga dili na makatabok pa sa laing panimalay, hinungdan nga gisaka na sa ikaupat nga alarma sa 10:14 sa gabii hangtud na nga giisa sa task force alpha sa alas 10:32 sa gabii.
Sa 40 ka mga balay nga naugdaw sa Sityo Bukog sa maong barangay, nidanyos kini og P500 mil.
Lakip sa nasunog mao panimalay sa barangay kapitan sa T. Padilla nga si Michael Ralota.
Matod ni Navarro, tanang posibilidad nga rason sa dali sa pagkatap sa kayo sutaon sa ilang himuon nga imbestigasyon sanglit ila pa nga pakig-estoryahan ang nag-abang sa maong kwarto nga si Padilla tungod wala kini sa pagkasunog.
“Dili pata makasulti gyud kon unsay hinungdan sa maong sunog kay ato pang subayon labi na nga walay tawo ang kwarto,” matod ni Navarro.
Lakip usab sa sutaon sa kabomberohan ang posibilidad nga overloading sa kuryente ang hinungdan sa pagsilaub sa kayo tungod kay ubay-ubay ang nag-abang.
Samtang, si Cheryl Bontuyan kinsa nahinabi sa Superbalita Cebu nibutyag nga niadtong tungora siya ug ang iyang anak nga si Gerald paingon na unta sila nga mangatulog, apan kalit nga mibarog ang iyang anak aron sutaon kong asa ang giingong sunog.
“Nagsinggit naman gud ang mga tawo sa gawas Sir mao na nga akong anak ako siyang gisugo kon tan-awon sa taas sa balay kay naa may bintana kon asa ang sunog. Dako naman ang kayo nga nisugat,” matod ni Bontuyan. “Wala gyud mi nadala sir.." dugang asoy ni Bontuyan. (BBT)