Dul-an sa P6M balor sa shabu nasakmit

DUL-AN sa P6 milyunes nga balor sa illegal nga drugas ang nasakmit sa kapulisan sa siyudad sa Sugbo ug dakbayan sa Mandaue niadtong Sabado sa gabii, Enero 4, ug kagahapon sa kaadlawon, Dominggo, Enero 5.

Unang nasikop sa mga sakop sa City Intelligence Branch nga gipangulohan ni Police Major Randy Caballes ang usa ka lumad nga Bol-anon nga si Johnrey Abala Balolong, 36, nga lumad nga taga lungsod sa Bien Unido apan kasamtangan nga nagpuyo sa sitio Kilawan, Barangay Tanke, siyudad sa Talisay.

Nakuha gikan kaniya ang 850 gramos nga gituohang shabu nga mobalor og P5.780 milyones base sa Dangerous Drugs Board (DDB) value.

Matod ni Caballes, kapin sa duha ka semana nila nga gipanid-an ang suspek human milutaw ang iyang pangalan nga kuhaanan sa mga nangadakpan sa dakbayan sa Sugbo.

Human masuta nga namaligya kini, ila gilayon gihimo ang buy bust operation sa may South Road Properties habig na sa Barangay Mambaling sa siyudad sa Sugbo.

Sa dihang nakahatag na sa usa ka putos nga gituohang shabu ang suspek, nagpaila dayon ang nakapalit nga pulis sila ug gidiretso na dayon kini og dakop.

Giingong makabaligya si Balolong og tag usa ka kilo matag semana sa Tanke gani ang tibuok Talisay ang iyang area nga customer ug moabot pa kini sa mga silingang barangay sa dakbayan sa Sugbo.

Siya usab ang kuhaanan sa mga gagmay nga drug pusher nga mamaligya sa siyudad sa Sugbo ug mga silingang lungsod sa probinsya.

Nailhan na usab nila kinsa ang tig-supply kaniya sa illegal nga drugas nga wala lang una nganli ni Caballes tungod kay mao kini ang sunod nga target sa follow up operation.

“Nakakuha ta sa iyang kuhaanan unya dili pa nato nganlan for follow up operation. Siya ang mid level unya naa pud siyay hagbonganan nga mokuha niyag tag 100 grams. So, dinagko na gyud ning iyaha,” matod ni Caballes.

Nalakip si Balolong sa high value target sa Cebu City Police Office (CCPO) ug sa kapulisan sa siyudad sa Talisay.

Samtang pagka alas 3:45 kagahapon sa kaadlawon, Enero 5, nasikop usab sa Mabolo Police Station ang usa ka biyudo ug ang iyang live in partner atol sa buy bust operation niini sa sitio Graje, Barangay Busay.

Ang mga nasikop mao silang Ruben Geculi, 65, ug Clyde Del Mar, 29, nga pulos taga sitio Graje, Barangay Busay.

Nakuha gikan kanila ang 30 gramos nga gituohang shabu nga mobalor ang tanan sa P204 mil. Padayon pa sa ilang imbestigasyon ang Mabolo Police Station labot sa source sa duha alang sa himuon nga follow- up operation.

Sa laing bahin, pito ka mga lalake nasikop sa mga kapulisan sa Mandaue human nakuhaan og kinatibuk-an nga P410 mil balor sa shabu sa managlahing operasyon.

Usa ka lalake nga gituohang high value target nasikop sa kapulisan human nakuhaan og P340 mil nga balor sa shabu niadtong Sabado sa hapon, Enero 4 sa alas 12:45 sa North Reclamation Area, Subangdaku, Mandaue City.

Nasikop si Joemarie Londres Jr., 29, taga Guadalupe, Banawa Cebu City, sa hiniusang buy-bust operation sa Mandaue City Police Office Station 2 ug Philippine Drug Enforcement Agency (PDEA).

Nakuhaan kini og 50 ka gramos sa gituohang shabu nga nagbalor og P340 mil.

Sigon ni PCpt. Marvin Fegarido, hepe sa MCPO Station 2, nga si Londres kaya niya nga makabaligya og usa ka kilo sa usa ka semana gani dinagko ang matag transaksyon niini ug 25 gramos ang labing minus nga mabaligya sa maong suspek.

Dugang ni Fegarido nga dili lang sa siyudad sa Sugbo ang mga transaksyon ni Londres lakip sab ang Mandaue.

Gipadala sa Crime Lab ang nakuha nga mga shabu ug sigon ni Fegarido nga sa panahon nga makuha na ang resulta niini ugma, Lunes, Enero 6, 2020, mapasakaan na kini og kaso nga paglapas sa Republic Act 9165 Article 2, Sec. 11 ug 5. Sa pagkakaron, si Londres anaa sa kustodiya sa MCPO Station 2.

Sa laing operasyon, nasikop ang unom ka mga lalake human nakuhaan og P70 mil nga balor sa shabu sa checkpoint nga gipahigayon sa MCPO Station 5 sa Lopez Jaena St. Mandaue City, sugod ala una sa kaadlawon niadtong Dominggo, Enero 5.

Ang mga nadakpan sa managlahing operasyon sa checkpoint mao sila si Renante Aquitan, 49, taga Jagobiao, Mandaue City; Richie Noval, 40, taga Jagobiao, Mandaue City; Lyndon Montello, 20, Lahug, Cebu City; Orlando Pepito, 32, Consolacion; Jeroen Alontaga, 30, Cordova; Jimmrey Lim, 22, Tipolo, Mandaue City.

Nakuhaan sila og 10.42 ka gramo nga shabu nga adunay DDB value nga P70,856. Kasamtangang anaa sa kustodiya sa MCPO Station 5 ang mga dinakpan. (Dugang taho ni KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph